- प्रेमिकांना खुश ठेवण्यासाठी करायचे मोबाईलची चोरी…
न्यूज पीसीएमसी नेटवर्क
पिंपरी (दि. १४ जानेवारी २०२१) :- गेल्या काही दिवसांपासून भोसरी उड्डाणपुलाच्याखाली दुचाकीवरून आलेले अज्ञात मोबाईलवर बोलत पायी चालणाऱ्या व्यक्तींचे मोबाईल हिसकावत असल्याचं समोर आले होते. याची माहिती दरोडा विरोधी पथकाला मिळाली होती. त्यानुसार त्यांनी भोसरी उड्डाण पुलाखाली सापळा रचून आरोपींना अटक केली. सागर सावळे आणि निलेश भालेराव असे आरोपींची नावे आहे. सागर हा २२ वर्षांचा असून निलेश हा अवघ्या १९ वर्षांचा आहे.
आरोपींकडे अधिक चौकशी केली असता दोन्ही आरोपी हे काम प्रेयसींना खूष करण्यासाठी करायचे अशी माहिती समोर आली. दोघेही आरोपी तरुण असून या दोघांचेही प्रेमसंबंध होते. त्यामुळेच आपल्या प्रेयसीला इम्प्रेस करण्यासाठी ते मोबाईल चोरत असल्याची कबुली त्यांनी पोलिसांसमोर दिली आहे.
दोन्हीही आरोपी आपल्या प्रेयसींना दर थोड्या दिवसांनी नवीन मोबाईल बदलून द्यायचे. प्रेयसीला चोरीतील मोबाईल देऊन त्यांना खुश करण्यासाठी या दोघांनी गुन्हेगारीचा मार्ग स्वीकारला होता. दोघेही जण चोरलेले मोबाईल आपल्याला देत असल्याची माहिती प्रेयसीला नसल्याचं पोलिसांनी सांगितले आहे. दोघांकडून दोन लाख ४२ हजार रुपये किंमतीचे २६ मोबाईल आणि तीन दुचाकी पोलिसांनी हस्तगत केल्या आहेत. या दोघांच्या चौकशीमध्ये एकूण नऊ गुन्हे उघडकीस आले आहेत. वरिष्ठ पोलीस निरीक्षक उत्तम तांगडे यांच्या पथकाने ही कारवाई केली आहे.