- मेट्रोच्या कास्टिंग यार्डमध्ये लोखंडी साहित्य अंगावर कोसळून कामगाराचा मृत्यू…
न्यूज पीसीएमसी नेटवर्क
पिंपरी (दि. ०१ जानेवारी २०२१) :- मेट्रोच्या कामाचे लोखंडी साहित्य अंगावर पडल्याने एका कामगाराचा मृत्यू झाला. कासारवाडी रेल्वे स्थानकाजवळ असलेल्या कास्टिंग यार्डमध्ये शुक्रवारी (दि. ३१) सकाळी हा अपघात झाला. अल्बक्ष शेख (वय २६, पत्ता माहिती नाही) असे मृत्यू झालेल्या कामगाराचे नाव आहे.
वरिष्ठ पोलिस निरीक्षक सुनील टोणपे यांनी दिलेल्या माहितीनुसार, पिंपरी चिंचवड शहर परिसरात मेट्रोचे काम सुरू आहे. पिंपरी चिंचवडचे कास्टिंग यार्ड पिंपळे सौदागर येथील कासारवाडी रेल्वे स्थानकाजवळ आहे. मयत अल्बक्ष शेख हा मागील काही दिवसांपासून कास्टिंग यार्डमध्ये काम करीत होता.
दरम्यान, शुक्रवारी सकाळी क्रेनच्या सहाय्याने काम सुरूअसताना अचानक लोखंडी साहित्य खाली कोसळले. यातील एक लोखंडी सळई शेख यांच्या डोक्यात पडली. त्यामुळे तो गंभीर जखमी झाला. शेख यांना उपचारासाठी दाखल नजीकच्या रुग्णालयात करण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी जाहीर केले. याप्रकरणी दोषींवर गुन्हा दाखल करण्याचे काम सुरू होते. तपास सांगवी पोलिस करीत आहेत.