- दोनशे कोटी रुपयांच्या आरोपाचे व्हायरल पत्र केवळ बदनामीसाठी – कृष्ण प्रकाश…
न्यूज पीसीएमसी नेटवर्क
पिंपरी (दि. ६ मे २०२२) :- पिंपरी चिंचवड पोलिस आयुक्तालयात सध्या एका पत्राने चांगलीच खळबळ उडवली आहे. पिंपरी चिंचवडचे तत्कालीन आयुक्त कृष्णप्रकाश यांच्यासाठी जमीन व्यवहारातून तब्बल २०० कोटी रुपये जमा करण्यात आल्याचा दावा या बनावट पत्रात करण्यात आला आहे. कृष्णप्रकाश यांच्या काळात त्यांचे रीडर आणि सामाजिक सुरक्षा पथकात कार्यरत असणारे सहाय्यक पोलिस निरीक्षक अशोक डोंगरे यांच्या नावे मुख्यमंत्र्यांना पाठवलेले हे सध्या सोशल मिडियावर प्रचंड व्हायरल झालं आहे. दरम्यान आरोप करण्यात आलेल्या पत्रावर ज्या पोलीस अधिकाऱ्याचं नाव आहे त्या अधिकाऱ्याने देखील आपलं नाव वापरून खोटी सही करून पोलीस विभागाची बदनामी केल्याची तक्रार पिंपरी चिंचवड पोलीस आयुक्तांकडे केलीय.
पिंपरी चिंचवड पोलीस आयुक्तालयातील सहायक पोलीस निरीक्षक डॉ. अशोक डोंगरे यांच्या नावाचा गैरवापर करून माझे पोलीस आयुक्त पदाच्या कारकिर्दीत आपल्याकडून चुकीची कामे करून घेतल्या बाबतचा तक्रारी अर्ज सोशल मीडियावर आज दिवसभर व्हायरल होत आहे. सदर पत्र हे पूर्णतः खोटे असून या अनुषंगाने सहाय्यक पोलीस निरीक्षक डॉ. अशोक डोंगरे यांनीच लेखी तक्रार अर्ज पोलीस आयुक्तांकडे दिला असल्याने सदर लेटर हे केवळ आणि केवळ माझी बदनामी करण्यासाठी लिहिण्यात आले असल्याचे स्पष्ट होत आहे. अशा प्रकारची बदनामी करण्याचे प्रयत्न यापुर्वी देखिल वारंवार केले गेले होते व ते असफल ठरलेले आहेत.
पिंपरी चिंचवड आयुक्त म्हणून काम करत असताना नागरिकांचे सर्वाधिक प्रेम , आपुलकी व आशीर्वाद मिळाले असल्यामुळे अशा प्रकारचे विघ्नसंतोषी लोकांचे आरोपांना फारशी किंमत न देता त्यावर कायदेशीर कारवाई करण्यावरच मी भर देणार आहे, तसेच जे कोणी माझी अशा प्रकारची बदनामी करू इच्छितात त्यांनी ही बाब लक्षात घेणे आवश्यक आहे की “ मी माझ्या कर्तव्यनिष्ठ कामगिरीमुळे नागरिकांच्या मनात चांगले स्थान निर्माण करू शकलो व पोलीस दलाची प्रतिमा कायम उज्वल करू शकलो त्याला धक्का लावणे माझे कायदेशीर व अनुशासनात्मक कारवाई मुळे दुखावलेल्यांना कदापि शक्य नाही. “