स्वामी विवेकानंद कॉलेजमध्ये युवासेना-शिवसेनेच्या वतीने शिक्षक दिन उत्साहात साजरा…

• शिक्षकांच्या योगदानाचा गौरव; शिक्षक हे समाजाच्या जडणघडणीतील महत्त्वाचे शिल्पकार – निलेश हाके…

न्यूज पीसीएमसी नेटवर्क

दापोडी–फुगेवाडी (दि. ०९ सप्टेंबर २०२६) :- शिक्षक दिनाचे औचित्य साधून युवासेना-शिवसेना दापोडी–फुगेवाडीच्या वतीने स्वामी विवेकानंद कॉलेजमध्ये शिक्षक दिन उत्साहपूर्ण आणि आनंदी वातावरणात साजरा करण्यात आला. विद्यार्थ्यांच्या शैक्षणिक तसेच सर्वांगीण विकासामध्ये शिक्षकांचे असलेले योगदान आणि समाजाच्या जडणघडणीत शिक्षकांची असलेली महत्त्वपूर्ण भूमिका यांचा गौरव करण्याच्या उद्देशाने या कार्यक्रमाचे आयोजन करण्यात आले होते.

या कार्यक्रमास महाविद्यालयाचे मा. प्राचार्य श्री. वाय. जी. कांबळे, जनरल सेक्रेटरी प्रा. सुभाष जावळे, असिस्टंट सेक्रेटरी प्रा. प्रदीप नागवडे, ज्युनिअर कॉलेज विभागप्रमुख प्रा. मेजर किशोर पाटील यांच्यासह महाविद्यालयातील सर्व शिक्षकवृंद व शिक्षकेतर कर्मचारी मोठ्या संख्येने उपस्थित होते.

यावेळी उपस्थित शिक्षकांचा सन्मान करून त्यांना शिक्षक दिनाच्या मनःपूर्वक शुभेच्छा देण्यात आल्या. शिक्षक केवळ विद्यार्थ्यांना पुस्तकी ज्ञान देत नाहीत, तर विद्यार्थ्यांच्या व्यक्तिमत्त्वाची जडणघडण करून त्यांना आयुष्यात योग्य दिशा देण्याचे महत्त्वपूर्ण कार्य करतात. विद्यार्थ्यांच्या यशामागे शिक्षकांचे मार्गदर्शन, संस्कार आणि परिश्रम यांचा मोठा वाटा असतो. त्यामुळे शिक्षकांच्या कार्याचा सन्मान करणे ही प्रत्येकाची जबाबदारी असल्याचे यावेळी सांगण्यात आले.

“शिक्षक हे देशाचे भविष्य घडविणारे खरे शिल्पकार आहेत. विद्यार्थ्यांना ज्ञानासोबत संस्कार, शिस्त आणि सामाजिक बांधिलकीची जाणीव करून देण्याचे काम शिक्षक करत असतात. त्यामुळे शिक्षकांप्रती आदर आणि कृतज्ञता व्यक्त करण्यासाठी शिक्षक दिनाच्या निमित्ताने हा उपक्रम आयोजित करण्यात आला,” असे युवासेना शहर संघटक निलेश हाके यांनी सांगितले.

कार्यक्रमादरम्यान महाविद्यालयातील शिक्षकांनी युवासेना-शिवसेनेच्या वतीने आयोजित करण्यात आलेल्या या उपक्रमाचे कौतुक केले. शिक्षक आणि शिक्षकेतर कर्मचाऱ्यांप्रती आदर व्यक्त करणाऱ्या अशा उपक्रमांमुळे सामाजिक बांधिलकी अधिक मजबूत होते, तसेच विद्यार्थी आणि शिक्षक यांच्यातील स्नेहाचे नाते अधिक दृढ होण्यास मदत होते.

शिक्षण क्षेत्रात कार्यरत असलेल्या सर्व शिक्षकांच्या योगदानाबद्दल कृतज्ञता व्यक्त करत, त्यांच्या पुढील वाटचालीसाठी शुभेच्छा देण्यात आल्या. शिक्षक दिनाचा हा कार्यक्रम अत्यंत उत्साहपूर्ण वातावरणात पार पडला.

या संपूर्ण कार्यक्रमाचे आयोजन युवासेना शहर संघटक निलेश हाके यांनी केले होते. कार्यक्रमाच्या यशस्वी आयोजनासाठी युवासेना-शिवसेना दापोडी–फुगेवाडीच्या पदाधिकारी व कार्यकर्त्यांनी सहकार्य केले.