पहिल्याच पावसात पिंपरी चिंचवड पालिकेची आपत्ती व्यवस्थापन टीम हतबल..

• प्रशासनाने ताबडतोब बैठक लावून कार्यवाही करावी; अमित गोरखे यांची मागणी…

न्यूज पीसीएमसी नेटवर्क

पिंपरी (दि. २३ जून २०२४) :- पिंपरी चिंचवड शहरात आज पहिलाच जोरदार पाऊस झाला असून यामध्ये खास करून पिंपरी विधानसभा क्षेत्रातील अनेक झोपडपट्ट्यांमध्ये पावसाचे पाणी घराघरात गेलेले आहे. ड्रेनेजचे पाणी या पावसाच्या पाण्यात मिक्स होऊन ड्रेनेजचे पाणी घराघरात पाणी गेल्याची परिस्थिती खास करून दत्तनगर, विद्यानगर, शंकरनगर या भागात झालेली दिसली. यातून पालिकेने पावसापूर्वी कुठलीच दक्षता घेतली नाही, हे दिसून आले आहे.

आज पिंपरीमधील भाटनगर, मिलिंद नगर त्याचबरोबर आनंदनगर अशा मोठ्या वस्त्यांमध्ये पावसाचे प्रचंड पाणी घराघरात शिरले असून गोरगरीब जनतेचे साठवलेली धान्य व इतर मोठे नुकसान झालेले आहे. पालिकेचे अधिकारी व प्रशासक निद्रस्थ अवस्थेत आहेत. याबाबत ताबडतोब पालिकेची बैठक घ्यावी. परिसरातील वस्त्यांमध्ये झोपडपट्ट्यांतील भागांमध्ये पुढील येणाऱ्या काळात बचावात्मक कार्यवाही करावी. आपण काय करू शकतो याकडे लक्ष देण्याची गरज आहे, असे पिंपरी विधानसभा भाजप प्रमुख अमित गोरखे यांनी म्हटले आहे.

पिंपरी चिंचवड परिसरातील अनेक रस्त्यावरसुद्धा व सोसायटीमध्येसुद्धा अशी परिस्थिती आज बघायला मिळालेली आहे. त्यामुळे ताबडतोब ड्रेनेज, स्ट्रॉंम लाईन्स स्वच्छ करून घेणे गरजेचे आहे. याबाबत आयुक्त तथा पालिकेच्या आपत्ती व्यवस्थापनाचे प्रमुख यांना भेटून निवेदन देणार असून यावर ताबडतोब कार्यवाही झाली पाहिजे जेणेकरून गोरगरीब नागरिकांचे नुकसान होणार नाही, असे अमित गोरखे यांनी प्रसिद्धीस दिलेल्या निवेदनात म्हटले आहे.