- पिंपरी चिंचवडमधुन अमित गोरखेंना थेट विधानपरिषदेवर संधी?…
न्यूज पीसीएमसी नेटवर्क
पिंपरी (दि. २८ जून २०२४) :- विधानपरिषदेच्या ११ जागांसाठी येत्या १२ जुलै रोजी निवडणूक होणार असून यासाठी भाजपने १० नावे निश्चित करीत ही यादी भाजच्या केंद्रातील शिर्षस्थ नेतृत्वाकडे पाठवल्याचे समजते. यामध्ये रावसाहेब दानवे, पंकजा मुंडे, हर्षवर्धन पाटील आणि पिंपरी चिंचवड शहरातून अमित गोरखे आदी नावांचा समावेश असल्याचे समजते. मात्र याबाबत राज्यातील भाजप पक्षाकडून अद्याप कोणताही अधिकृत दुजोरा देण्यात आलेला नाही.
राज्यातील भाजपच्या नेत्यांनी विधान परिषदेसाठी दहा उमेदवारांची नावे निश्चित करीत ही यादी केंद्राकडे अंतिम मंजूरीसाठी पाठवल्याचे खात्रिलायकरित्या समजते. या दहा नावांमध्ये माजी मंत्री रावसाहेब दानवे, पंकजा मुंडे, हर्षवर्धन पाटील, चित्रा वाघ, अमित गोरखे, परिणय फुके, सुधाकर कोहळे, योगेश टिळेकर, निलय नाईक आणि माधवी नाईक यांच्या नावाचा समावेश असल्याचे समजते.
विधान परिषदेच्या ११ जागांसाठी होत असलेली निवडणूक अतिशय चुरशीची होणार आहे. दोन उमेदवार निवडून येण्याची शक्यता असताना महाविकास आघाडी देखील तिसरा उमेदवार देण्याच्या तयारीत आहेत. रिक्त जागांनुसार, महायुतीचे ९ तर महाविकास आघाडी दोन उमेदवार निवडून येऊ शकतात. लोकसभा निकालांमुळे आमदारांमधली अस्वस्थता ओळखून आणि संभाव्य राजकीय समीकरणे पाहता आघाडीकडून तिसरा उमेदवार देऊन खेला होबे करण्याचा प्रयत्न होऊ शकतो.