प्रभाग क्रमांक २८ पिंपळे सौदागरमध्ये भाजपच्या प्रचाराचा उत्सव..

• भाजपच्या अनिताताई संदीप काटे यांचे फुलांची उधळण, औक्षण आणि घोषणा देत स्वागत…

न्यूज पीसीएमसी नेटवर्क

पिंपळे सौदागर (दि. ०७ जानेवारी २०२६) :- पिंपळे सौदागर-रहाटणी परिसरातील प्रभाग क्रमांक २८ मध्ये भाजपच्या अधिकृत उमेदवार अनिताताई संदीप काटे यांच्या प्रचाराने सध्या उत्सवाचे स्वरूप धारण केले आहे. घराघरांत जाऊन मतदारांशी थेट संवाद साधत असताना नागरिकांकडून त्यांना उत्स्फूर्त प्रतिसाद मिळत असून ठिकठिकाणी फुलांची उधळण, औक्षण आणि घोषणा देत स्वागत करण्यात येत आहे.

प्रचारादरम्यान अनिता काटे यांनी परिसरातील पाणीपुरवठा, रस्ते, ड्रेनेज, कचरा व्यवस्थापन, आरोग्य सुविधा आणि महिलांसाठी सुरक्षिततेसारख्या मुद्द्यांवर नागरिकांशी चर्चा केली. “विकासाचा अजेंडा पुढे नेण्यासाठी नागरिकांचा पाठिंबा आवश्यक आहे. मागील काळात प्रभागात झालेली विकासकामे आणि पुढील नियोजन नागरिकांसमोर मांडत आहोत,” असे त्या म्हणाल्या.

या प्रचारात भाजपचे पदाधिकारी, कार्यकर्ते, महिला आघाडी तसेच युवक मोठ्या संख्येने सहभागी झाले आहेत. ढोल-ताशांच्या गजरात, फलक व बॅनरच्या माध्यमातून प्रचाराला रंगत आली आहे. ज्येष्ठ नागरिक, महिला आणि तरुण वर्गाकडूनही अनिताताई काटे यांना सकारात्मक प्रतिसाद मिळत आहे.

नागरिकांनी व्यक्त केलेल्या समस्या आणि सूचना तत्काळ नोंदवून त्यावर उपाययोजना करण्याचे आश्वासन अनिताताई काटे यांनी दिले. प्रभाग २८ मध्ये विकास, पारदर्शक कारभार आणि सातत्य यासाठी भाजपला संधी द्यावी, असे आवाहनही त्यांनी केले.