जाहिरात महसुलातून मोठा आर्थिक फायदा अपेक्षित..

• रस्त्यांवरील कमानी व वीज खांबांवरील जाहिरातींसाठीची प्रक्रिया पूर्ण..
• कोट्यवधींचे उत्पन्न मिळण्याचा महापालिकेचा दावा…

संतोष जराड, प्रतिनिधी…

न्यूज पीसीएमसी नेटवर्क

पिंपरी चिंचवड (दि. १० फेब्रुवारी २०२६) :- पिंपरी-चिंचवड महानगरपालिकेला जाहिरातींच्या माध्यमातून मोठ्या प्रमाणात महसूल मिळण्याची शक्यता निर्माण झाली आहे. शहरातील रस्त्यांवरील कमानी तसेच वीज खांबांवर जाहिरात फलक लावण्यासाठीची प्रशासकीय प्रक्रिया पूर्ण झाल्याची माहिती समोर आली आहे.

गेल्या काही वर्षांपासून या जाहिरात प्रक्रियेमध्ये विलंब होत असल्याने पालिकेचे संभाव्य उत्पन्न रखडले होते. त्यामुळे शहरात अनधिकृत जाहिरातींचे प्रमाणही वाढल्याची चर्चा होती. आता नव्याने निविदा प्रक्रिया पूर्ण झाल्यानंतर महापालिकेला मोठ्या प्रमाणात महसूल मिळू शकतो, असा प्रशासनाचा दावा आहे.

शहरातील प्रमुख रस्ते, उड्डाणपूल आणि ग्रेड सेपरेटर परिसरात जाहिरात फलक लावण्याची परवानगी देण्यात येणार आहे. विविध विभागांनुसार जाहिरातींसाठी जागा निश्चित करण्यात आली असून त्यातून वार्षिक मोठा आर्थिक फायदा होण्याची अपेक्षा व्यक्त करण्यात येत आहे.

दरम्यान, निविदा प्रक्रिया उशिरा पूर्ण झाल्यामुळे मागील काही वर्षांतील आर्थिक नुकसानाबाबतही प्रश्न उपस्थित होत आहेत. यामध्ये अनधिकृत जाहिरातींमुळे महसूल घटल्याची शक्यता नाकारता येत नाही. पालिकेला मिळणारा हा अतिरिक्त महसूल शहरातील विकासकामांसाठी वापरला जाईल, असा दावा केला जात असला तरी निविदा प्रक्रियेला झालेला विलंब आणि त्यातून झालेल्या संभाव्य आर्थिक तोट्याबाबत जबाबदारी निश्चित करण्याची मागणी होत आहे.

जाहिरातींतून मिळणारा संभाव्य महसूल…

• उड्डाणपूल व ग्रेड सेपरेटर परिसरातून मोठा महसूल अपेक्षित
• शहरातील मुख्य रस्त्यांवरील कमानींवर जाहिरातींना परवानगी
• वीज खांबांवरील जाहिरातींतूनही उत्पन्न वाढणार
• विविध विभागनिहाय जाहिरातींसाठी जागा निश्चित
• अनधिकृत जाहिरातींवर नियंत्रण आणण्याचा प्रशासनाचा दावा