पिंपरी चिंचवड महापालिकेची विक्रमी महसूल वसुली…

• पाणी, मालमत्ता कर व विविध विभागांत वसुलीचा उच्चांक..
• नागरिकांच्या प्रतिसादातून मिळणार विकासाला गती…

न्युज पीसीएमसी नेटवर्क

पिंपरी-चिंचवड (दि.०१ एप्रिल २०२६) :- पिंपरी चिंचवड महानगरपालिकेने आर्थिक वर्ष २०२५-२६ मध्ये विविध विभागांमार्फत महसूल वसुलीत उल्लेखनीय आणि विक्रमी कामगिरी नोंदवली आहे. पाणीपुरवठा विभागाने यंदा ८० कोटी ७४ लाख रुपयांची पाणीकर वसुली करत आतापर्यंतचा उच्चांक प्रस्थापित केला. सांगवी क्षेत्राने सर्वाधिक ७ कोटी ६५ लाख रुपयांची वसुली करत अव्वल स्थान मिळवले. डिजिटल नोटिसा, ऑनलाइन भरणा सुविधा आणि थकबाकीदारांवर कारवाई यामुळे वसुलीला गती मिळाली.

दरम्यान, कर संकलन व कर आकारणी विभागाने तब्बल ९६१ कोटी रुपयांचा मालमत्ता कर वसूल केला. सलग दुसऱ्या वर्षी साडेनऊशे कोटींचा टप्पा पार करण्यात यश आले. सुमारे ७.३२ लाख मालमत्तांपैकी ६.३१ लाख मालमत्ताधारकांनी कर भरला. अभय योजनेतून एका महिन्यात २०२ कोटींची वसुली झाली, तर वाकड विभागाने सर्वाधिक ११७ कोटींचा महसूल दिला. थकबाकीदारांवर कारवाई, जनजागृती मोहीम आणि ऑनलाइन सुविधा यांचा सकारात्मक परिणाम दिसून आला.

आकाशचिन्ह व परवाना विभागानेही २१ कोटी ५० लाख रुपयांची वसुली करत महसुलात वाढ नोंदवली. जाहिरात परवाना शुल्क, दंड आणि भाडे शुल्कातून उत्पन्न वाढले. अनधिकृत जाहिरातींवर कारवाई आणि नियमांची अंमलबजावणी यामुळे ही वाढ शक्य झाली.

झोपडपट्टी निर्मूलन व पुनर्वसन विभागाने १ कोटी १० लाख रुपयांचा सेवाकर वसूल करत गेल्या पाच वर्षांतील सर्वोच्च आकडा गाठला. ऑनलाइन सुविधा आणि विशेष मोहिमांमुळे नागरिकांचा चांगला प्रतिसाद मिळाला.

महापालिकेच्या या सर्व विभागांच्या एकत्रित कामगिरीमुळे शहराच्या विकासकामांना मोठी चालना मिळणार असून पाणीपुरवठा, पायाभूत सुविधा आणि सेवा अधिक सक्षम करण्यावर भर दिला जाणार आहे.