पिंपरी-चिंचवड पोलिस शिपाई भरतीची लेखी परीक्षा विनाअडथळा पार..

• अठ्ठावीसशे पेक्षा अधिक भावी पोलिसांची परीक्षेसाठी हजेरी…

न्यूज पीसीएमसी नेटवर्क

पिंपरी (दि. १० ऑगस्ट २०२४) :- पिंपरी-चिंचवड पोलिस दलाच्या आस्थापनेवरील २६२ पोलिस शिपाई पदांसाठी भरतीची लेखी परीक्षा शनिवारी (दि. १०) सकाळी दहा ते दुपारी साडेबाराच्‍या दरम्‍यान ताथवडे येथील श्री बालाजी विद्यापीठ येथे पार पडली.

पात्र ठरलेल्या २९८९ उमेदवारांपैकी प्रत्यक्ष २८२८ उमेदवार लेखी परीक्षेसाठी हजर होते. लेखी परीक्षेसाठी १६१ उमेदवार गैरहजर राहिले. या परीक्षेत कोणताही गैरप्रकार झाला नसल्‍याची माहिती पोलिसांनी दिली.

पिंपरी-चिंचवड पोलिस दलात २६२ पदे भरली जाणार आहेत. त्यामध्ये सर्वसाधारण उमेदवारांसाठी ७९, महिला १८, खेळाडू १५, प्रकल्पग्रस्त १४, भूकंपग्रस्त ४, माजी सैनिक ४१, अंशकालीन पदवीधर ११, पोलिस पाल्य ७, गृहरक्षक दल १३, अनाथ ३ पदे राखीव आहेत. भरती प्रक्रियेत प्रथम शारीरिक चाचणी घेण्यात आली. त्यामध्ये किमान ५० टक्के गुण मिळवणाऱ्या उमेदवारांमधून १:१० प्रमाणात उमेदवारांना लेखी परीक्षेसाठी बोलावले आहे. त्या उमेदवारांची १०० गुणांची लेखी परीक्षा घेण्यात आली. उमेदवारांनी लेखी परीक्षेत किमान ४० टक्के गुण मिळवणे आवश्यक आहे. ४० टक्क्यांहून कमी गुण मिळवणारे उमेदवार अपात्र समजले जातील.

लेखी परीक्षेदरम्यान कोणताही अनुचित प्रकार घडू नये, परीक्षा सुरक्षित वातावरणात पार पडावी यासाठी पिंपरी – चिंचवड पोलिसांनी चोख नियोजन केले होते. परीक्षेत कोणताही अनुचित प्रकार घडला नसल्‍याचे पोलिसांनी सांगितले. लेखी परीक्षेसाठी चार पोलिस उपायुक्त, नऊ सहाय्यक पोलिस आयुक्त, ३१ पोलिस निरीक्षक, १३३ सहाय्यक पोलिस निरीक्षक/पोलिस उपनिरीक्षक, ४४४ पोलिस अंमलदार आणि २० वार्डन असा बंदोबस्त लावण्यात आला होता.