पिंपरी चिंचवड शहरातील निर्बंध काहीसे शिथिल..

• सोमवार ते शुक्रवारी सर्व दुकाने रात्री आठ वाजेपर्यंत राहणार खुली..
• पॉझिटिव्हीटी रेट वाढल्यास पुन्हा निर्बंध लागू होणार…
• महापौर माई ढोरे यांच्या शिष्टाईला यश…

न्यूज पीसीएमसी नेटवर्क

पिंपरी (दि. ०८ ऑगस्ट २०२१) :- पिंपरी चिंचवड महानगरपालिकेच्या महापौर उषा उर्फ माई ढोरे यांनी महाराष्ट्र राज्याचे उपमुख्यमंत्री तथा पुण्याचे पालकमंत्री यांच्याकडे पिंपरी-चिंचवड शहरातील व्यापारी वर्गांना, दुकानदारांना दिलासा द्यावा व दुकाने व व्यवसाय रात्री आठ वाजेपर्यंत सुरू ठेवण्यात यावी, असे आदेश देण्याची मागणी केली होती. त्यांच्या या मागणीला यश आले असून आज रविवारी पालकमंत्र्यांसोबत झालेल्या बैठकीत पिंपरी-चिंचवड शहरात सोमवार ते शुक्रवार सर्व दुकाने रात्री आठ वाजेपर्यंत सुरू राहणार आहेत.

तसेच शनिवार व रविवार या दोन दिवशी दुपारी चार वाजेपर्यंत दुकाने सुरू राहतील तसेच व्यावसायिकांनी व दुकानदारांनी आपली साप्ताहिक सुट्टी घ्यावी, असा निर्णय पालकमंत्र्यांच्या बैठकीत घेण्यात आला.

दोन-तीन दिवसांपूर्वीच महापौर उषा उर्फ माई ढोरे यांनी महाराष्ट्र राज्याचे मुख्यमंत्री व उपमुख्यमंत्री यांना पिंपरी-चिंचवड शहरात कोरोना चा प्रादुर्भाव कमी झाल्याने पिंपरी-चिंचवड शहरातील व्यावसायिकांना दिलासा द्यावा व दुकाने व व्यवसाय रात्री आठ वाजेपर्यंत सुरू ठेवण्यात यावी अशी मागणी केली होती त्यांची मागणीची तत्पर दखल घेण्यात आली असून पुण्याचे पालकमंत्री अजित पवार यांच्यासोबत आज झालेल्या बैठकीत महापौर माई ढोरे यांच्या मागणीला यश आले आहे.

• शहरातील सर्व दुकानं सकाळी ७ ते रात्री ८ पर्यंत सुरु ठेवण्याची परवानगी.
• हॉटेल-रेस्तराँ सर्व दिवस रात्री १० पर्यंत सुरु ठेवता येणार. 
• मॉल रात्री ८ पर्यंत सुरु ठेवण्यास परवानगी देण्यात आली आहे.
• मॉल्समध्ये फक्त दोन लस घेतलेल्यांनाच प्रवेश दिला जाणार. 
• हॉटेल चालक आणि दुकानदारांना लशीचे दोन्ही डोस घेणं बंधनकारक.
• सर्व उद्यानं नियमित वेळेनुसार सुरु राहणार.
• जलतरण तलाव वगळता इतर आऊटडोअर खेळांना परवानगी.
• सात टक्क्यांच्या पुढे पॉझिटिव्हीटी रेट गेल्यास पुन्हा निर्बंध लागणार.
• मास्क वापरणं बंधनकारक.