नॉर्वे देणार महापालिकेस राडारोडा आणि प्लास्टिकच्या पुनर्वापराविषयीचे धडे..

• नॉर्वेच्या तीन सदस्यीय शिष्टमंडळाची महापालिकेस भेट…

न्यूज पीसीएमसी नेटवर्क

पिंपरी (दि. ११ ऑगस्ट २०२२) :- कोणत्याही टाकाऊ वस्तूंचा पुनर्वापर करण्याची यंत्रणा विकसित केल्यास मानवी जीवनासाठी कल्याणकारी आणि पर्यावरण पूरक ठरेल असे प्रतिपादन नॉर्वे देशाचे कॉन्सूलेट जनरल अर्न जान फ्लोलो यांनी केले. बांधकाम राडा रोडा आणि प्लास्टिकच्या पुनर्वापराविषयी नॉर्वे देशातील तंत्रज्ञानाबाबत माहिती देण्यासाठी तसेच त्या दृष्टीने भारतातील शहरांमध्ये अशा कंपन्यांची गुंतवणूक करण्याच्या अनुषंगाने आज फ्लोलो यांच्या नेतृत्वाखाली तीन सदस्यीय शिष्टमंडळाने पिंपरी चिंचवड महानगरपालिकेला भेट दिली.

यामध्ये सिंटेफ कंपनीचे वरिष्ठ शास्त्रज्ञ ख्रिस्तीन एजेलसण, तोम्रा सिस्टीम कंपनीचे प्रतिनिधी गार्गी पारीख तसेच नॉर्वे दूतावासाचे आर्थिक आणि परराष्ट्र नीती खात्याचे भारतातील सल्लागार राहुल माहेश्वरी यांचा समावेश होता. शिष्टमंडळ आणि महापालिका अधिकारी यांच्या समवेत टाकाऊ वस्तूंच्या पुनर्वापराविषयी विस्तृत चर्चा झाली. आयुक्त राजेश पाटील यांनी शिष्टमंडळाचे स्वागत केले. या नंतर झालेल्या बैठकीत शिष्टमंडळ आणि महापालिका अधिकारी यांच्या समवेत टाकाऊ वस्तूंच्या पुनर्वापराविषयी विस्तृत चर्चा झाली.

यावेळी महापालिकेचे अतिरिक्त आयुक्त विकास ढाकणे, जितेंद्र वाघ, शहर अभियंता मकरंद निकम, सह शहर अभियंता संजय कुलकर्णी, रामदास तांबे, श्रीकांत सवणे, प्रमोद ओभांसे, मुख्य माहिती व तंत्रज्ञान अधिकारी नीलकंठ पोमण, उप आयुक अजय चारठाणकर, कार्यकारी अभियंता नितीन देशमुख, बापूसाहेब गायकवाड, सी.एस.आर सेलचे सल्लागार विजय वावरे, जनसंपर्क अधिकारी किरण गायकवाड आदी उपस्थित होते.

नॉर्वे येथील सिंटेफ आणि तोम्रा कंपनीच्या वतीने संगणकीय सादरीकरणाद्वारे बांधकाम राडा रोडा आणि प्लास्टिकच्या पुनर्वापरा बद्दल माहिती देण्यात आली. भारतातील विविध शहरांमध्ये सद्यस्थितीत असलेल्या टाकाऊ वस्तूंच्या पुनर्वापरा संबंधीच्या विविध प्रकल्पाविषयी तसेच पुनर्वापर करून कशा प्रकारे टाकाऊ वस्तू पासून वापरात येणाऱ्या वस्तू बनविता येतील याबाबत माहिती देण्यात आली. पिंपरी चिंचवड शहरामध्ये प्रगत तंत्रज्ञाचा अवलंब करून विविध प्रकल्प उभारल्यास नागरिकांना चांगल्या पायाभूत सुविधा उपलब्ध करून देता येऊ शकतात. नॉर्वे देशाने बांधकाम राडा रोडा आणि प्लास्टिक पुनर्वापरा विषयीचे तंत्रज्ञान विकसित केले आहे. या तंत्रज्ञानाचा वापर पिंपरी चिंचवड शहराने केल्यास घनकचरा व्यवस्थापन योग्य पद्धतीने करण्यास मदत होईल असे मत कॉन्सूलेट जनरल अर्न जान फ्लोलो यांनी व्यक्त केले.आयुक्त राजेश पाटील यांनी या तंत्रज्ञानाची अधिक माहिती घेण्याची सूचना उपस्थित अधिकाऱ्यांना केली.