सेवानिवृतांकडून वारसाहक्काने सेवेत कार्यरत कर्मचाऱ्यांच्या पालिकेकडे तक्रारी..

•  कुटुंबियांचा सांभाळ न करणे, स्वयंघोषित प्रतिज्ञापत्रातील तरतुदींचा केला भंग…

न्यूज पीसीएमसी नेटवर्क

पिंपरी (दि. १४ डिसेंबर २०२२) :- अनुकंपा तत्वावर तसेच लाड-पागे समितीच्या शिफारसींच्या आधारे महापालिकेच्या सेवेत रुजू झालेल्या वारस कर्मचाऱ्यांच्याबाबत त्यांच्या कुटुंबीयांनी केलेल्या तक्रारी सोडविण्यात येणार असून यासाठी महापालिकेच्या सामन्य प्रशासन विभागामार्फत स्वतंत्र परिपत्रक निर्गमित करण्यात आले आहे.

शासन निर्देशासार महापालिकेच्या सेवेमधील कर्मचा-यांच्या पात्र वारसांना अनुकंपा तत्वानुसार तसेच लाड पागे समितीच्या शिफारसीनुसार वारस नियुक्त्या दिल्या जातात. अशा पात्र वारसदार व्यक्तीद्वारे स्वत:च्या कुटुंबियांचा सांभाळ करण्याबाबत महापालिका सेवेत रुजू होण्यापूर्वी स्वयंघोषित प्रतिज्ञापत्र किंवा बंधपत्र महापालिकेस सादर केली जातात. तथापि, कुटुंबियांचा सांभाळ न करणे तसेच स्वयंघोषित प्रतिज्ञापत्र किंवा बंधपत्रातील तरतुदींचा भंग करीत असल्याच्या तक्रारी सेवानिवृत्त कर्मचाऱ्यांनी सामान्य प्रशासन विभागाकडे केल्या आहेत. या तक्रारींचे निवारण समुपदेशनामार्फत करण्यासाठी सामान्य प्रशासन विभागामार्फत परिपत्रकाद्वारे कळविण्यात आले आहे.

तक्रारी सोडवण्यासाठी समुपदेशक व लाभार्थी या दोघांमध्ये मैत्रीपूर्ण वातावरण व सामंजस्याने होणारे हेतुपूर्वक संभाषण आवश्यक आहे. समुपदेशन ही एक मानसशास्त्रीय प्रक्रिया असून त्याचा लाभार्थी आणि समुपदेशक या दोघांच्याही मानसिकतेवर परिणाम होतो. तसेच ते दोघे परस्परांच्या मानसिकतेवर परिणाम करीत असतात. त्यामुळे लाभार्थीत स्वत:मध्ये बदल होऊन तो स्वतःच्या समस्या स्वतः सोडविण्यास समर्थ होतो. तक्रारी अर्जासंबंधित कर्मचाऱ्यांच्या वर्तनात सुधारणा करण्यासाठी व समुपदेशनाद्वारे तक्रारींचे निवारण करण्यासाठी महापालिका आस्थापनेवरील वैद्यकीय सामाजिक कार्यकर्ता आणि कामगार कल्याण विभाग यांच्या समन्वयाने समुपदेशकामार्फत तक्रारींचे निवारण करण्यात येणार असून यासाठी यशवंतराव चव्हाण स्मृती रुग्णालयाची मदत घेण्याबाबत परिपत्रकात नमूद करण्यात आले आहे.