न्यूज पीसीएमसी नेटवर्क
पिंपरी (दि. २५ जानेवारी २०२३) :- बेशिस्त वाहनचालकांवर कारवाईसाठी पिंपरी चिंचवड वाहतूक पोलिसांनी विशेष मोहीम राबविली. यात विरुद्ध दिशेने तसेच ‘नो एंट्रीमधून वाहन चालविल्याप्रकरणी मोठी कारवाई केली. या मोहिमेत शुक्रवार (दि. २०) आणि शनिवार (दि. २१) या दोन दिवसात ८८७ जणांवर कारवाई करून ४ लाख ९६ हजारांचा दंड आकारला.
पिंपरी चिंचवड पोलिस आयुक्तालयांतर्गत वाहतुकीला शिस्त लावण्याच्या तसेच अपघातांची संख्या कमी करण्याच्या उद्देशाने ही मोहीम पोलिसांनी हाती घेतली आहे. विरुद्ध दिशेने वाहन चालविल्याप्रकरणी वाहतूक कारवाई झाली. सांगवी, हिजवडी, वाकड, निगडी, पिपरी, भोसरी, चिंचवड, चाकण, महाळुंगे, दिघी-आळंदी, देहूरोड, तळवडे, तळेगाव, बावधन परिसरात वाहतूक विभागाकडून दंडात्मक कारवाई करण्यात आली.
विरुद्ध दिशेने येणाऱ्या वाहनांमुळे अपघाताची शक्यता निर्माण होते. तसेच वाहतूककोंडी होते. त्यामुळे वादही होतात. तसेच वाहतूक नियमांचे उल्लंघन होते. त्यामुळे वाहतूक पोलिसांनी अशा बेशिस्त वाहनचालकांवर कारवाईचा बडगा उगारला आहे. नो एंट्रीमधून वाहन चालविल्याप्रकरणी सांगवी आणि वाकड विभागात सर्वाधिक कारवाई झाली.
वाहतूक नियमांचे पालन होणे आवश्यक आहे. त्यासाठी विविध उपाययोजना केल्या जात आहेत. अपघात रोखण्यासाठी वाहतुकीला शिस्त आवश्यक आहे. त्यासाठी बेशिस्त वाहनचालकांवर कारवाई केली जात आहे. विशेष मोहीम राबवली जात असून, दंडात्मक कारवाई केली जात आहे. वाहन चालकांनी वाहतूक नियमांचे पालन करावे. सतीश माने, सहायक पोलिस आयुक्त, वाहतूक शाखा
न्यूज पीसीएमसी Whatsapp Share करीता आपला मो.नं.रजिस्टर करा.