लेटलतीफ कर्मचाऱ्यांवर कारवाईचा इशारा..

• विभाग प्रमुखांना अहवाल पाठविण्याचे फर्मान…

न्यूज पीसीएमसी नेटवर्क

पिंपरी (दि. २० फेब्रुवारी २०२३) :- एका महिन्यामध्ये तीन वेळेपेक्षा जास्त वेळा उशिरा आल्यास किंवा केवळ एक वेळ थम्ब केल्यास त्या कर्मचाऱ्यावर कारवाई करणे गरजेचे आहे. मात्र, संबंधित विभागप्रमुखांकडून कारवाई केली जात नाही. यापुढे बेशिस्त कर्मचाऱ्यांवर कारवाई न करता त्यांना पाठीशी घालणाऱ्या विभागप्रमुखांवर कारवाई केली जाणार आहे, असा इशारा या महापालिकेच्या सामान्य प्रशासन विभागाने दिला आहे.

पिंपरी-चिंचवड महापालिकेच्या विविध विभागांमधील विभागप्रमुख कर्मचाऱ्यांचा हजेरी अहवाल प्रशासन विभागाकडे पाठवत नाहीत. तपासणी पथकाने पाहणी केल्यानंतर बेशिस्त कर्मचाऱ्यांवर कारवाई केली जात नसल्याचे आढळून आले आहे.

महापालिकेमध्ये कर्मचाऱ्यांच्या हजेरीसाठी फेस रिडींग सिस्टीम लावण्यात आली आहे. मात्र, अनेक कर्मचारी वेळेत येत नाहीत. फेस रिडींग करून बाहेर निघून जातात. अशा बेशिस्त कर्मचाऱ्यांवर कारवाई केली जात नाही. या संदर्भात संबंधित विभागप्रमुखांनी त्याबाबतचा अहवाल २७ फेब्रुवारीपर्यंत सामान्य प्रशासन विभागाला पाठवावा. तसे न केल्यास संबंधितांवर कारवाई करण्याचा इशारा सामान्य प्रशासन विभागाचे उपायुक्त विठ्ठल जोशी यांनी दिला आहे.