- अपक्ष उमेदवार राहुल कलाटे तिसऱ्या क्रमांकावर…
न्यूज पीसीएमसी नेटवर्क
पिंपरी (दि. ०२ मार्च २०२३) :- चिंचवड विधानसभा पोटनिवडणुकीच्या मतमोजणीत क्षणोक्षणी रंगत वाढताना दिसत आहे. पहिल्या ते सहाव्या फेरीदरम्यान भाजपच्या अश्विनी जगताप याच आघाडीवर असताना दिसून येत आहेत. जगताप यांना २०५२९ मत पडली आहेत. महाविकास आघाडीचे नाना काटे १७२१० तर राहुल कलाटे यांनी ७१४१ मते घेतली आहेत. अश्विनी जगताप या ३३१९ मतांनी आघाडीवर आहेत.
प्राप्त झालेल्या मतदान मतमोजणीने आज सकाळी आठच्या सुमारास थेरगाव येथील शंकर आण्णा गावडे कामगार भवन या ठिकाणी मतमोजणीला सुरुवात झाली. सकाळी ९ वाजता पहिल्या राउंडमध्ये भाजपच्या अश्विनी जगताप यांना ४०५३ मतं पडली होती. त्यानंतर दुसऱ्या क्रमांकावर महाविकास आघाडीचे नाना काटे यांना ३०६४ मतं पडली होती. तर तिसऱ्या क्रमांकावर राहुल कलाटे होते. त्यांना १२६७ मतं मिळाली होती. नोटाला १०६ मतं पडली होती. सुरुवातीपासूनच पहिल्या ते सहाव्या क्रमांकापर्यंत जगताप याच आघाडीवर असताना दिसून येत आहे.
मतमोजणी सुरू होण्यापूर्वी मतमोजणीसाठी नियुक्त केलेल्या कर्मचाऱ्यांची सरमिसळ (रँडमायझेशन) करण्यात आली. त्यानंतर उमेदवारांचे प्रतिनिधी आणि निवडणूक निरीक्षक, निवडणूक निर्णय अधिकारी यांच्या उपस्थितीत मतपेटी कक्षाचे सील काढण्यात आले.
निवडणूक निरिक्षक एस. सत्यनारायण, निवडणूक निर्णय अधिकारी सचिन ढोले, सहाय्यक निवडणूक निर्णय अधिकारी अजित पाटील, शिरीष पोरेडी, शितल वाकडे, निवडणूक सहाय्यक तथा तहसीलदार नागेश गायकवाड, निवडणूक सहाय्यक प्रशांत शिंपी, थॉमस नरोन्हा, ईव्हीएम कक्षाचे समन्वयक बापूसाहेब गायकवाड, टपाली मतदान कक्षाचे समन्वयक राजेश आगळे, डॅशबोर्डच्या समन्वयक अनिता कोटलवार, माध्यम कक्ष समन्वयक किरण गायकवाड, निवडणूक सहाय्यक तथा नायब तहसीलदार श्वेता आल्हाट, संतोष सोनवणे यावेळी उपस्थित होते.
मतमोजणीसाठी नियुक्त करण्यात आलेल्या पर्यवेक्षक, सहायक आणि सूक्ष्म निरीक्षकांना मतमोजणी विषयक प्रशिक्षण देण्यात आले आहे. मतमोजणी प्रक्रियेच्या अनुषंगाने कर्तव्ये, जबाबदा-या आणि आवश्यक कामकाज याबद्दल या प्रशिक्षणामध्ये सविस्तर माहिती आणि सूचना देण्यात आल्या.
मतमोजणीच्या एकूण ३७ फेऱ्या होणार आहेत. यासाठी प्रत्येकी १४ टेबल अधिक टपाली मतपत्रिकांसाठी १ टेबल असे एकूण १५ टेबल असणार आहेत. १८ पर्यवेक्षक, १८ सहायक आणि १८ सूक्ष्म निरीक्षकांची मतमोजणी कामकाजासाठी नेमणूक करण्यात आली आहे.