पीएमआरडीएच्या लाभार्थ्यांसाठी भोसरी शाखेत कर्मचारी वाढवा..

• साडेचार हजारहून अधिक ग्राहक मीटरच्या प्रतीक्षेत
• संतोष सौंदणकर यांची महावितरणाकडे मागणी…

न्यूज पीसीएमसी नेटवर्क

पिंपरी ( दि. ०७ जून २०२३) :- पीएमआरडीएच्या पेठ क्रमांक १२ मधील गृह प्रकल्पाच्या लाभार्थ्यांनी ४ हजार ५०० विद्युत मीटरसाठी महावितरणच्या भोसरी शाखेकडे मागणी केली. मात्र, कार्यालयात पुरेसे मनुष्यबळ नसल्यामुळे कोटेशन काढण्यास विलंब होतो आहे. तरी, शाखा कार्यालयात मनुष्यबळ उपलब्ध करुन देण्यात यावे, अशी मागणी शिवसेना उध्दव बाळासाहेब ठाकरे पक्षाचे शहर संघटक तथा विद्युत सनियंत्रण समितीचे सदस्य संतोष सौंदणकर यांनी केली.

यासंदर्भात सौंदणकर यांनी महावितरण पुणे परिमंडळचे मुख्य अभियंता राजेंद्र पवार यांना निवेदन दिले. त्यात म्हटले आहे की, पीएमआरडीएने पेठ क्रमांक १२ येथे आर्थिक दुर्बल आणि अल्प उत्पन्न गटातील नागरिकांसाठी गृह प्रकल्प विकसित केला. आजपासून लाभार्थ्यांना घरांचा ताबा देण्यात येतो आहे. त्यातील लाभार्थ्यांनी ४ हजार ५०० विद्युत मीटरसाठी भोसरी शाखा कार्यालयाकडे अर्ज केले आहे. एवढ्या लाभार्थ्यांना एकाच वेळी एवढ्या मोठ्या संख्येने मीटर उपलब्ध करुन देणे शक्‍य नाही. कारण, शाखा कार्यालयात मनुष्यबळाचा अभाव आहे.

नागरिकांना वेळेत मीटर देण्यासाठी महावितरणकडून भोसरी शाखा कार्यालयात अतिरिक्त तीन ते चार कर्मचारी उपलब्ध करुन द्यावेत. जेणेकरुन मीटरसाठी येणाऱ्या नागरिकांना कोटेशन काढून देणे, विद्युत विषयक कामकाज करणे सोयीचे होईल. त्यामुळे नागरिकांना वेळेत मीटरही मिळेल, अशी मागणी सौंदणकर यांनी मुख्य अभियंता पवार यांच्याकडे केली आहे.

पेठ क्रमांक १२ मधील सदनिकाधारकांना साडेचार हजार विद्युत मीटरची आवश्‍यकता होती. त्यामुळे मी स्वतः पुणे परिमंडळचे मुख्य अभियंता राजेंद्र पवार यांच्याकडे मागणी केली. त्यावर लागलीच त्यांनी एक हजार मीटर उपलब्ध करुन दिली. आता ३ हजार ५०० मीटरची आवश्‍यकता आहे. त्यासाठी कर्मचारी देखील ते उपलब्ध करुन देतील. त्यानंतर प्रत्येकाला वेळेत वीज मीटर मिळू शकेल, असे संतोष सौंदणकर यांनी म्हटले आहे.
——-