इथे सुटीच्या दिवशी अनं रात्री-अपरात्री देखील होतेय दस्त नोंदणी..

• आयटी क्षेत्रातील कर्मचाऱ्यांना होतोय विशेष फायदा…

न्यूज पीसीएमसी नेटवर्क

पिंपरी (दि. ३१ ऑगस्ट २०२३) :- नोंदणी व मुद्रांक शुल्क विभागाकडून नागरिकांची होणारी गैरसोय टाळून त्यांना वेळेवर आणि सुटीच्या दिवशी देखील सेवा देण्यासाठी तसेच रात्र पाळीतसुद्धा काम करण्याचा निर्णय काही वर्षापुर्वीच घेतला. नागरिकांना या सेवेचा आता लाभ होत असून, दस्त नोंदणीसाठी तासनतास न ताटकळता काही वेळातच नोंदणी करून नागरिक घरी जात असल्याचे चित्र दापोडी येथील सह दुय्यम निबंधक कार्यालय २५ मध्ये दिसून येत आहे.

पिंपरी-चिंचवड शहरात एकूण आठ सह दुय्यम निबंधक कार्यालये आहेत. सर्वच कार्यालयामध्ये दस्त नोंदणीसाठी नागरिकांची गर्दी असते. कधी सर्व्हर डाउन तर कधी विजेचा खोळंबा आदी कारणांमुळे नागरिकांची गैरसोय होताना दिसून येते. त्यामुळे दस्ताची सर्व कामे खोळंबून नागरिकांना दिवस-दिवस ताटकळत बसावे लागते. त्यामुळे नागरिकांचा विनाकारण वेळ वाया जातो. तर आयटीसह एमआयडीसीमधील अनेक कंपन्या सर्व शासकिय आणि निमशासकिय कार्यालयांना शनिवार आणि रविवारी सुटी असल्याने ही कार्यालये देखील बंद असतात. सुटी असून नागरिकांना दस्त नोंदणी करता येत नव्हती. मात्र नोंदणी व मुद्रांक विभागाने अशा नागरिकांसाठी सुटीच्या दिवशी व रात्र पाळीतही दोपोडी येथील १७ व २५ क्रमांकाचे कार्यालयामधून नागरिकांना सेवा देण्याचे काम अविरतपणे सुरू आहे.

या सेवेचा लाभ आयटी कंपनीतील कर्मचाऱ्यांना मोठ्या प्रमाणात होत आहे. यामुळे विभागाच्या तिजोरीत मोठा महसूल जमा होत असल्याचे अधिकाऱ्यांनी सांगितले. हा उपक्रम शहरात यशस्वी असल्याचे मत नागरिकांनी व्यक्त केले आहे

आयटी क्षेत्रातील कर्मचाऱ्यांना या कार्यालयाचा विशेष फायदा होत आहे. पाच नंतरही येथील कार्यालयात दस्त नोंदणी केली जाते. त्यामुळे नागरिकांना खास या कामासाठी सुटी घेण्याची गरज नाही. सायंकाळी सहा नंतरही अधिक दस्त नोंदविले जात आहेत.
– ए. बी. सोडनवर, सह दुय्यम निबंधक कार्यालय, दापोडी.