लाडक्या बहिणींसाठी आणखी एक खूशखबर..

• दिवाळीपूर्वीच लाडक्या बहिणींना तीन हजारांची भाऊबीज..!

न्यूज पीसीएमसी नेटवर्क

पिंपरी (दि. ०३ ऑक्टोबर २०२४) :- बीड येथील सभेत बोलताना उपमुख्यमंत्री अजित पवारांनी लाडक्या बहिणींसाठी आणखी एक खूशखबर दिली आहे. आचारसंहिता लागण्यापूर्वी लाडक्या बहिणींना भाऊबीज म्हणून ३ हजार रुपये देणार आहे, हा अजितदादांचा वादा आहे, असे वक्तव्य त्यांनी केले आहे. यामुळे लाडक्या बहिणींची दिवाळी आणखी गोड होणार आहे.

माजलगाव येथील सभेत बोलताना अजित पवार म्हणाले, लाडकी बहीण योजनेवरून विरोधक टीका करतात, पण आमच्या अंगाला काही भोके पडत नाहीत. ते सत्चेत असताना कोणती योजना आणली? असा सवाल त्यांनी उपस्थित केला. माता आणि माऊलींसाठी आम्ही लाडकी बहीण योजना आणली आहे, तुम्ही तुमच्या हक्काचे पैसे कधीही काढू शकता, असे अजित पवार म्हणाले.

मी बोलतो तसा वागतो, हा अजितदादांचा वादा आहे. रक्षाबंधनला जसे ३ हजार रुपये दिले तसेच भाऊबीजेला माझ्या लाडक्या बहिणींना मी रिकाम्या हाताने पाठवणार नाही, तिला ओवाळणी देणार म्हणजे देणार हा माझा वादा आहे, असा विश्वास अजित पवारांनी दिला आहे. आम्ही दिलेल्या योजना पाच वर्षे सुरू ठेवण्यासाठी तुम्हाला घड्याळ या चिन्हाला मतदान करावे लागेल, असे आवाहन देखील त्यांनी यावेळी केले.

मुख्यमंत्री लाडकी बहीण योजनेचे तीन हप्ते महिलांच्या खात्यात जमा झाले आहेत. रक्षाबंधन सणाच्या आधी महिलांच्या बँक खात्यात योजनेचे दोन हप्त्यांचे ३००० रुपये जमा झाले होते. त्यानंतर २९ सप्टेंबर रोजी दुसरा हप्ता जमा करण्यात आला. आता दिवाळीला देखील महिलांच्या बँक खात्यात ३ हजार जमा होणार असल्याचा वादा अजित पवारांनी केला आहे. जर हे पैसे जमा झालेच तर यंदाची दिवाळी महिलांसाठी आणखी गोड होणार, यात काही शंका नाही.