न्यूज पीसीएमसी नेटवर्क
पिंपरी (दि. ११ एप्रिल २०२५) :- दीनानाथ मंगेशकर रुग्णालयात वेळेत उपचार न मिळाल्याने मृत्यू पावलेल्या तनिषा भिसे या गर्भवती महिलेच्या कुटुंबाला उपमुख्यमंत्री एकनाथ शिंदे यांनी पाच लाख रुपयांची आर्थिक मदत जाहीर केली. मात्र, भिसे कुटुंबीयांनी ही नाकारली आहे. तसेच मंत्री चंद्रकांत पाटील यांची एक लाख रुपयांची आर्थिक मदतही नाकारली असून, ‘आम्हाला पैसे नको, मात्र दीनानाथ मंगेशकर रुग्णालयातील चुकीच्या लोकांवर कारवाई करा’, अशी मागणी भिसे कुटुंबीयांनी केली आहे.
यापुढे अशा घटना कधीही घडू नये, यासाठी प्रयत्न करण्याची विनंती भिसे कुटुंबीयांनी सरकारकडे केली. दीनानाथ मंगेशकर रुग्णालय प्रशासनाने अंतर्गत समितीच्या नावाखाली आमचीच बदनामी केली, असे भिसे कुटुंबीयांचे म्हणणे आहे. अंतर्गत समितीच्या अहवालामुळे तनिषा भिसे यांची आयव्हीएफसारख्या ट्रिटमेंटची माहिती सार्वजनिक झाली. या अहवालामुळे अनेक चुकीचे प्रश्न निर्माण झाले आणि कुटुंबाला ट्रोल करण्यात आले, असेही भिसे कुटुंबीयांनी म्हटले आहे.
याबाबत पुण्यातील अलंकार पोलिस ठाण्यात तक्रारही दाखल केली आहे. राज्य महिला आयोगाही कारवाईचे आदेश पोलिस, मेडिकल कौन्सिलला दिले. तनिषा यांची आयव्हीएफसारख्या ट्रिटमेंटची माहिती जगजाहीर केल्याने कुटुंबाची बदनामी झाल्याने संबंधितांवर कारवाईची मागणी कुटुंबियांनी केली.
न्यूज पीसीएमसी Whatsapp Share करीता आपला मो.नं.रजिस्टर करा.