न्यूज पीसीएमसी नेटवर्क
पिंपरी (दि. ०९ मार्च २०२३) :- भूमी कन्स्ट्रक्शनचा बांधकाम व्यवसायिक आरोपी पंकज प्रकाश येवला (वय ३५, रा. रहाटणी) याचा म्हाडा आणि लाभार्थ्यांची फसवणूक केल्याप्रकरणी अटकपूर्व जामीन अर्ज न्यायालयाने फेटाळून लावला आहे. न्यायालयाने येवला याला कोठडीत ठेवण्याचे आदेश दिले आहेत.
म्हाडाचे मिळकत व्यवस्थापक विजय ठाकूर यांनी बंडगार्डन पोलीस ठाण्यात फिर्याद दिली होती. मे २०१९ मध्ये म्हाडाने काढलेल्या लॉटरीत भूमी कन्स्ट्रक्शनतर्फे पंकज येवला यानी सादर केलेल्या भूमी ब्लेसिंग या गृहप्रकल्पाचा समावेश होता. त्याअनुषंगाने म्हाडाने काढलेल्या लॉटरीत जून २०१९ मध्ये लाभार्थ्यांची यादी प्रसिद्ध केली होती. लाभार्थ्यांना देकार पत्र देण्यात आले होते. लाभार्थी आणि विकसक यांच्यात करारनामा झाल्यानंतर सदनिकेच्या मोबदल्यापोटी ७० टक्के रक्कम मिळाली होती. पंकज येवला याने करारानुसार लाभार्थ्यांना २० सप्टेंबर २०२० पर्यंत गृहप्रकल्पाचे बांधकाम पूर्ण करुन ताबा देणे बंधनकारक होते. मात्र, ताबा दिला नाही. ताबा मिळण्यास विलंब झाल्याने लाभार्थ्यांनी ११ डिसेंबर २०२० रोजी तक्रार केली होती.
येवला याच्याशी म्हाडाच्या पुणे कार्यालयातील मुख्य अधिकाऱ्यांनी संपर्क साधला. त्यांची बैठकही झाली होती. त्या वेळी ३१ मार्च २०२२ पूर्वी लाभार्थ्यांना सदनिकेचा ताबा देण्याचे आश्वासन देण्यात आले होते. मात्र, त्यानंतर येवला याने कोणतीही कार्यवाही केली नाही. त्यामुळे लाभार्थ्यांनी उपोषण करण्याचा इशारा नोटीशीद्वारे दिला होता. त्यानंतर म्हाडाने या प्रकरणात पोलिसांकडे फिर्याद दिली होती. म्हाडाकडून विधी सल्लागार ॲड. श्रीकांत ठाकूर आणि मालेगावकर अँड असोसिएटसकडून ॲड. सिद्धांत मालेगावकर यांनी बाजू मांडली. म्हाडाच्या पुणे मंडळाचे मुख्य कार्यकारी अधिकारी नितीन माने-पाटील यांच्या मार्गदर्शनाखाली ही कार्यवाही करण्यात आली.
न्यूज पीसीएमसी Whatsapp Share करीता आपला मो.नं.रजिस्टर करा.