पालिकेच्या पाणी पुरवठा विभागाला कर संकलन विभाग देणार बुस्टर डोस…

न्यूज पीसीएमसी नेटवर्क

पिंपरी (दि. १५ जुलै २०२३) :- पिंपरी-चिंचवड महापालिकेला पाणी पुरवठा विभागाकडून म्हणावे तसे उत्पन्न मिळत नसून थकबाकीही वाढत असल्याने पाणीपट्टी वसुली कर आकारणी व कर संकलन विभाग करणार आहे. याबाबतचा आदेश महापालिका आयुक्त तथा प्रशासक शेखर सिंह यांनी जारी केला आहे.

शहरात सद्यस्थितीत 6 लाख 2 हजार मिळकती आहेत. शहरात घरगुती, व्यावसायिक मिळून असे 1 लाख 75 हजार अधिकृत नळजोड आहेत. महापालिकेच्या कर आकारणी व कर संकलन विभागाने गतवर्षी 817 कोटी रूपये वसूल केले आहेत.

एकीकडे कर संकलन विभागाचे उत्पन्न दिवसेंदिवस वाढत असताना पाणी पुरवठा विभागाकडून म्हणावी तशी पाणीपट्टी वसुली होत नाही. 2019-2020 मध्ये 42 कोटी 94 लाख 23 हजार, 2020-2021 मध्ये 41 कोटी 86 लाख 26 हजार, 2021-2022 मध्ये 54 कोटी 98 लाख 89 हजार तर 2022-23 या आर्थिक 55 कोटी रूपयांची वसुली झालेली आहे. तर पाणी पुरवठा विभागाची नळजोडधारकांकडे 60 कोटींपेक्षा अधिक रूपयांची थकबाकी आहे.

पाणीपुरवठा विभागाच्या 28 मीटर निरीक्षकांची आस्थापना (PCMC) करसंकलन विभागात वर्ग केली आहे. ते करसंकलन विभागाच्या अंतर्गत पाणीपट्टी वसुलीचे कामकाज करणार आहे. नळजोडाची माहिती, संगणकीय प्रणाली तसेच, पाणीपट्टीचे बिल वाटपाचे काम करत असलेली खासगी एजन्सी आदींवर करसंकलन विभागाचे नियंत्रण असणार आहे. मात्र, मीटर निरीक्षकांवर तांत्रिक नियंत्रण पाणीपुरवठा विभागप्रमुखांचे राहणार आहे.