पिंपरी चिंचवड शहर राष्ट्रवादीला अखेरीस शहराध्यक्ष मिळाला..

• अजित पवारांचे विश्वासू शिलेदार योगेश बहल यांची निवड..
• कार्यकर्त्यांनी सोडला सुटकेचा निश्वास…!

न्यूज पीसीएमसी नेटवर्क

पिंपरी (दि. ०७ ऑक्टोबर २०२४) :- राज्याचे उपमुख्यमंत्री अजित पवार यांच्या पिंपरी चिंचवड शहर राष्ट्रवादीला अखेरीस शहराध्यक्ष मिळाला आहे. माजी महापौर आणि अजित पवार यांचे विश्वासू शिलेदार योगेश बहल यांची त्याजागी निवड करण्यात आली आहे.

आगामी विधानसभा निवडणूक काही दिवसांवर येऊन ठेपलेल्या असताना एकेका‌ळी बालेकिल्ला असलेल्या पिंपरी-चिंचवडमध्ये उपमुख्यमंत्री अजित पवार यांची राष्ट्रवादी काँग्रेस दोन महिन्यांपेक्षा अधिक काळ शहराध्यक्षाविना होती. शहराध्यक्षपदासाठी प्रबळ दावेदार मानले जात असलेल्यांना आमदारकीचे वेध लागले होते. त्यामुळे कधीकाळी शहराध्यक्षपद मिळवण्यासाठी रस्सीखेच असलेल्या राष्ट्रवादीत आता मात्र शहराध्यक्ष पद घेण्यास कोणी तयार होत नसल्याचे चित्र होते.

बारामतीखालोखल पिंपरी-चिंचवड शहरावर उपमुख्यमंत्री अजित पवार यांचे वर्चस्व होते. सलग १५ वर्षे महापालिकेत राष्ट्रवादीची एकहाती सत्ता होती. ‘दादा बोले आणि प्रशासन डोले’ अशी परिस्थिती होती. त्यामुळे राष्ट्रवादीच्या शहराध्यक्षाला मोठे महत्व होते. या पदासाठी रस्सीखेच होत असे. अजित पवार यांनी भाजपसोबत सरकारमध्ये सहभागी होण्याची भूमिका घेतल्यानंतर संपूर्ण शहर कार्यकारिणी त्यांच्यासोबत राहिली. परंतु, लोकसभेला राष्ट्रवादीचा दारुण पराभव झाल्यानंतर राजकीय भवितव्यासाठी शहराध्यक्षांसह माजी नगरसेवकांनी पक्ष सोडला. भोसरीतून विधानसभा निवडणूक लढविण्यासाठी इच्छुक असलेल्या अजित गव्हाणे यांनी १६ जुलै २०२४ रोजी राष्ट्रवादीच्या शहराध्यक्षपदाचा राजीनामा दिला. समर्थक माजी नगरसेवकांसह राष्ट्रवादी काँग्रेस शरदचंद्र पवार पक्षात प्रवेश केला.

पक्षाची पडझड रोखण्यासाठी उपमुख्यमंत्री अजित पवार यांनी तत्काळ माजी नगरसेवकांची बैठक घेतली. शहरात येत मेळावाही घेतला. अध्यक्षपदासाठी काही नावे आली आहेत. त्यांपैकी कोणाला अध्यक्ष करायचे याची चाचपणी करत असून, लवकरच अध्यक्षाची नियुक्ती केली जाईल, असे सांगितले होते. मात्र, आज अखेरीस माजी महापौर योगेश बहल यांची वर्णी लागली आहे. त्यामुळे उरल्यासुरल्या अजित पवार गटातील कार्यकर्त्यांनी सुटकेचा निश्वास सोडला आहे.