न्यूज पीसीएमसी नेटवर्क
देहूगाव (दि. ०७ सप्टेंबर २०२५) :- शिक्षक दिनानिमित्त अभंग इंग्लिश मिडीयम स्कूल मधील विद्यार्थ्यांनी आज शिक्षकांची भूमिका अतिशय समर्थपणे साकार केली. इ.सातवीतील विद्यार्थी व विद्यार्थिनींनी अभ्यासक्रमातील विषय घेऊन इ. तिसरी ते सहावीतील विद्यार्थ्यांना अध्यापन केले. विद्यार्थ्यांच्या मनामध्ये प्रचंड उत्साह दिसून येत होता. आपण स्वतः शिक्षक झालो याचा त्यांना मनापासून आनंद वाटत होता.
शिक्षक दिनानिमित्त सर्व वर्गात आनंदाचे वातावरण होते. सर्व विद्यार्थी शिक्षकांना मनापासून सदिच्छा, शुभेच्छा देऊन त्यांच्याप्रती कृतज्ञता व्यक्त करीत होते. शिक्षक दिनानिमित्त या सर्व विद्यार्थी, शिक्षकांचे नियोजन करण्यासाठी प्राचार्या म्हणून कु.आर्या भसे, उपप्राचार्या म्हणून कु.आराध्या मोरे व पर्यवेक्षक म्हणून कौस्तुभ लिंभोरे यांनी कार्यभार सांभाळला. सर्व शिक्षक झालेल्या विद्यार्थ्यांनी शिक्षकांची जबाबदारी सुंदरपणे पार पाडली.
नसरापूर येथील शंकरराव भेलके महाविद्यालयाचे माजी प्राचार्य मा. शिवदास किरदात सर, राष्ट्रपतींच्या हस्ते गौरविण्यात आलेल्या आदर्श शिक्षिका सौ. सुजाता टोके मॅडम, अण्णासाहेब मगर महाविद्यालयाचे सेवानिवृत्त कार्यालयीन अधीक्षक मा. शहाजी ताकवले सर, सेवानिवृत्त सहाय्यक ग्रंथपाल मा. सुरेश ताकवले सर, सेवानिवृत्त मुख्य लिपीक मा. आत्तार सर, सामाजिक कार्यकर्ते मा. संदीपजी पी. शिंदे, प्रगतशील शेतकरी मा. भागुजी काळोखे, सौ. रूपाली टोके, सौ. शोभा बुचडे आदी मान्यवरांच्या हस्ते अभंग स्कूलच्या सर्व गुणवंत शिक्षकांचा पुस्तके व गुलाब पुष्प देऊन गौरव करण्यात आला.
शाळा नावाच्या ज्ञानंदिरातील आत्मा शिक्षक असतो. त्यांच्या ज्ञानदानाच्या अखंड सेवेतून उद्याची उज्वल पिढी घडत असते. विद्यार्थ्यांच्या कोवळ्या मनात सद्विचारांचे बिजारोपण होत असते. म्हणूनच सेवाभावनेने व सृजनशिलतेने विद्यार्थ्यांच्या जीवनाला पैलू पाडून एक सुंदर माणूस व आदर्श नागरिक घडविणारा प्रत्येक शिक्षक एक महान राष्ट्रकार्यच करीत असतो. म्हणूनच शिक्षक दिनानिमित्त सर्व शिक्षकांचा विशेष सन्मान करण्यात आला. तसेच शाळेच्या प्राचार्या डॉ. कविता अय्यर, उपप्राचार्या शैलजा स्वामी, पूर्व प्राथमिक विभागातील पर्यवेक्षिका सुबलक्ष्मी पाठक व इ. पहिली व दुसरीच्या समन्वयक योगिता नांगरे यांनाही याप्रसंगी विशेष सन्मानाने गौरविण्यात आले.
यावेळी सृजन फाउंडेशनचे अध्यक्ष सुनिल कंद व उपाध्यक्ष अशोक कंद उपस्थित होते. सृजन फाउंडेशनचे सचिव विकास कंद यांनी कार्यक्रमाचे प्रास्ताविक केले.
शिक्षक दिनानिमित्त शिक्षकांना विरंगुळा म्हणून शाळेतील अश्रफ शेख सर यांनी शिक्षकांसाठी मनोरंजनात्मक खेळांचे उत्तम नियोजन केले. तसेच इ. सातवी तील शिक्षक झालेल्या विद्यार्थ्यांच्या संपूर्ण नियोजनाची जबाबदारी सहशिक्षिका शितल भोसले व वृषाली आढाव यांनी पार पाडली. इ. सातवीतील अनन्या गायकवाड हिने सूत्रसंचालन तर हर्षदा वाघमारे हिने आभारप्रदर्शन केले.
न्यूज पीसीएमसी Whatsapp Share करीता आपला मो.नं.रजिस्टर करा.