ज्या शाळेत विद्यार्थी होते, तिथे आज आमदार म्हणून स्वागतासाठी उभे राहिलो..

• आ. अमित गोरखे यांनी दिली काळभोरनगर मनपा शाळेला भावनिक भेट…

न्यूज पीसीएमसी नेटवर्क

पिंपरी (दि. २१ जून २०२५) :- आमदार अमित गोरखे यांनी स्वतः शिकलेल्या स्वामी विवेकानंद प्राथमिक शाळा, काळभोरनगर मनपा शाळेत नवीन शैक्षणिक वर्षाच्या सुरुवातीला विद्यार्थ्यांचे स्वागत करत त्यांच्या आयुष्यातील एक भावनिक व प्रेरणादायी क्षण अनुभवला.

शासनाच्या ‘१०० शाळांना भेट’ या अभिनव उपक्रमांतर्गत निवड झालेल्या मनपा शाळेला भेट देण्यासाठी आमदार अमित गोरखे उपस्थित होते. या निमित्ताने विद्यार्थ्यांना मार्गदर्शन करताना त्यांनी आपल्या शालेय आठवणींना उजाळा दिला. “ही तीच शाळा आहे, जिथे मी विद्यार्थी म्हणून बसलो होतो, शिकलो होतो, घडलो होतो. आज आमदार म्हणून या शाळेत परत आलो, हे माझ्यासाठी अत्यंत अभिमानास्पद व भावनिक क्षण आहे,” अश्या भावना त्यांनी व्यक्त केल्या

विद्यार्थ्यांशी संवाद साधताना त्यांनी एक प्रेरणादायी कथा सांगितली: “प्रत्येकाच्या आत एक सिंह दडलेला असतो.आपण आपल्या सामर्थ्यावर विश्वास ठेवला पाहिजे. संधी मिळाल्यावर ते सामर्थ्य दाखवा कारण तुम्ही तुमचं भविष्य घडवू शकता!” विद्यार्थ्यांच्या चेहऱ्यावर आत्मविश्वास आणि शिकण्याची ऊर्जा पाहून समाधान व्यक्त करत त्यांनी शिक्षणाच्या गुणवत्तेबाबत काही महत्त्वाचे मुद्दे मांडले:

राज्य शासनाकडून सर्व शाळांमध्ये दर्जेदार शिक्षण आणि पायाभूत सुविधा पुरविण्यासाठी विशेष प्रयत्न सुरू आहेत. शिक्षकांनीही विद्यार्थ्यांना जीवनघडवणारे शिक्षण द्यावे, हे आपले कर्तव्य आहे. तसेच, ‘१० कोटी वृक्षारोपण’ या राज्य शासनाच्या उपक्रमाची माहिती देत त्यांनी विद्यार्थ्यांना कमीत कमी एका वृक्षाची लागवड व संगोपन करण्याचे आवाहन केले. यामुळे पर्यावरण विषयक सकारात्मक संस्कार विद्यार्थ्यांवर लहानपणापासून होतील, असे ते म्हणाले. या भावनिक आणि प्रेरणादायी भेटीत अनेक माजी विद्यार्थी आणि शाळेचे शिक्षक उपस्थित होते.

या कार्यक्रमासाठी प्राथमिक शिक्षण विभागाच्या सहाय्यक प्रशासक रजिया खान, क्षेत्रीय अधिकारी निवेदिता घार्गे, मा. नगरसेविका वैशाली काळभोर, मारुती भापकर, मुख्याध्यापक शंकर केदार, विशाल काळभोर, दिलीप दातीर पाटील, गणेश लंगोटे, महादू नेर्लेकर, दत्ता देवतरासे आणि शाळा समितीचे सदस्यही उपस्थित होते. कार्यक्रमाचे नियोजन शाळेच्या मुख्याध्यापिका वैशाली तवटे यांनी केले होते. तसेच शिक्षिका सुजाता इंदुलकर, पुष्पा नेवरे, अर्चना राऊत, पूनम उपरे, शैला लोखंडे, शाळेचा शिक्षकवर्ग उपस्थित होता.