तो दिवसा चायनीज गाडी चालवायचा अनं रात्री घरफोडी करायचा..

• पोलिसांनी शिकंजा कसत आरोपीसह साथीदाराला केले गजाआड… 

न्यूज पीसीएमसी नेटवर्क

पिंपरी (दि. ३० ऑगस्ट २०२१) :- चायनीजची गाडी लावून त्यावर उदरनिर्वाह सुरु असल्याचे भासवीत आरोपी हा दिवसरात्र  बंद घरांची पाहणी करून घरफोडीसाठी लागणारे हत्यारे आजूबाजूच्या परिसरात अडगळीच्या ठिकाणी टाकत होता. मध्यरात्री दोन वाजल्यानंतर येऊन ते घर फोडत होता. वाल्हेकरवाडीत वाढणाऱ्या घरफोडीच्या अनुषंगाने चिंचवड पोलिसांनी परिसरात शिकंजा कसला. सीसीटीव्ही फुटेज पोलिसांच्या हाती लागले. संशयित व्यक्ती त्यात मास्क लावून जाताना दिसला. एका विशिष्ट ठिकाणी गेल्यावर संशयित व्यक्ती सीसीटीव्ही कॅमेऱ्यात आढळत नसे. त्यामुळे पोलिसांनी संशयित आरोपीची माहिती काढून ओळख पटवली.

त्याच्यावर २००९ ते २०१२ मध्ये सोलापूर शहर पोलीस आयुक्तालयाच्या हद्दीतील सदर बाजार आणि फौजदार चावडी पोलीस ठाण्यात नऊ गुन्हे दाखल असल्याची माहिती चिंचवड पोलिसांना मिळाली. पोलिसांनी त्याला ताब्यात घेतले. अधिक चौकशी केल्यावर त्याने चिंचवड, भोसरी आणि चिखली परिसरात घरफोड्या केल्याचे कबूल केले.

त्याच्या दोन साथीदारांच्या मदतीने घरफोडी केलेला माल तो विकत होता. वाल्हेकरवाडी परिसरात घरफोडी केल्यावर त्याचा एक मित्र हा दुसऱ्या मित्राच्या घरी जाऊन झोपत. चोरीच्या पैशातून तो सावकारी व्यवसाय करत होता. फॉर्च्युनर गाडी एकाकडून जबरदस्तीने आणली होती. चोरी करून पैसे साठवून त्याला फ्लॅट घ्यायचा होता.

लखन अशोक जेटीथोर (वय ३२, रा. वाल्हेकरवाडी, चिंचवड. मूळ रा. सोलापूर) असे अटक केलेल्या अट्टल चोरट्याचे नाव आहे. त्याच्यासह रवी शिवाजी भोसले (वय ४२, रा. रहाटणी. मूळ रा. सोलापूर), सुरेश नारायण जाधव (वय ४२, रा. रहाटणी. मूळ रा. सातारा) यांना देखील अटक केली आहे. त्यांचा चौथा साथीदार कृष्णा जाधव सध्या फरार असून पोलीस त्याचा शोध घेत आहेत. या कारवाईमुळे चिंचवड येथील ७८ तोळे सोने, १० टीव्ही, गुन्ह्यासाठी वापरलेली फॉर्च्युनर असा एकूण ७७ लाख ४७ हजार २०० रुपयांचा मुद्देमाल पोलिसांच्या हाती लागला आहे.