‘महानगरपालिकेच्या निवडणुका कधीही लागल्या तरी आम्ही तयार’..

• ‘२०१७ पेक्षा अधिक नगरसेवक निवडून आणणार’ – आ. शंकर जगताप…

न्यूज पीसीएमसी नेटवर्क

पिंपरी (दि. १५ जानेवारी २०२५) :- पिंपरी-चिंचवड महानगरपालिकेवर पुन्हा एकदा एक हाती सत्ता आणायची आहे. २०१७ मध्ये दिवंगत आमदार लक्ष्मण जगताप आणि आमदार महेश लांडगे यांनी राष्ट्रवादीकडून सत्ता खेचून आणली होती. २०१७ पेक्षा अधिक नगरसेवक आगामी निवडणुकीत निवडून आणण्याचा प्रयत्न असल्याचे शंकर जगताप यांनी म्हटलं आहे. ते पिंपरीत प्रसारमाध्यमांशी बोलत होते.

पुढे ते म्हणाले, लोकसभेपासून स्थानिक स्वराज्य संस्थांच्या निवडणुकीची तयारी सुरू केली आहे. विविध योजना, उपक्रम भाजप राबवत आहे. प्रत्येकाच्या घरापर्यंत आम्ही पोहोचवत आहोत.

पिंपरी- चिंचवड शहरात एक हजार ४४२ बूथ आहेत. आमचे बूथप्रमुख तयार आहेत. महानगरपालिकेच्या निवडणुका कधीही लागल्या तरी आम्ही तयार आहोत. सध्या स्वबळावर की महायुती म्हणून आगामी महानगरपालिका लढणार हे स्पष्ट नाही. वरिष्ठ जो निर्णय घेतील त्यावर पुढील रणनीती ठरणार असल्याचंदेखील शंकर जगताप यांनी सांगितले.