त्या २४ युवकांना उपलब्ध झाल्या रोजगाराच्या संधी…

न्यूज पीसीएमसी नेटवर्क

पिंपरी (दि. १६ मे २०२५) :- शहरातील २४ युवकांना प्रतिष्ठित कंपनीत रोजगाराची संधी उपलब्ध झाली आहे. याद्वारे त्यांना तीन वर्षांचे व्यावसायिक प्रशिक्षण, स्टायपेंड, तसेच अन्य सुविधांसह करिअरचा नवा मार्ग उपलब्ध झाला आहे. टाटा मोटर्स आणि लाईटहाऊस कम्युनिटीज फाउंडेशन यांच्या संयुक्त विद्यमाने विशेष नोकरी मेळावा पिंपरी येथील लाईटहाऊस केंद्रात आयोजित करण्यात आला होता. आयटीआय उत्तीर्ण अथवा १२ वी पास युवक-युवतींसाठी ही सुवर्णसंधी खुली होती. या मेळाव्यास ८० हून अधिक युवक युवतींनी उत्स्फूर्त प्रतिसाद दिला. त्यापैकी ४२ उमेदवारांची प्राथमिक निवड झाली.

प्राथमिक निवड झालेल्या उमेदवारांनी लाईटहाऊसचा फाउंडेशन कोर्स पूर्ण केला. त्यानंतर टाटा मोटर्सच्या एचआर टीमने अंतिम मुलाखती घेतल्या, ज्यात २४ उमेदवारांची अंतिम निवड झाली. सर्व निवड झालेले उमेदवार वैद्यकीय तपासणीनंतर टाटा मोटर्समध्ये यशस्वीरित्या रुजू झाले आहेत. या उमेदवारांना तीन वर्षांचे मॅन्युफॅक्चरिंग डिप्लोमा प्रशिक्षण (एनटीटीएफ – नेटूर टेक्निकल ट्रेनिंग फाउंडेशन मार्फत), दरमहा १६ हजार रुपयांपर्यंत स्टायपेंड, तसेच कॅन्टीन व वाहतूक सुविधा दिल्या जाणार आहेत.

पिंपरी चिंचवड महानगरपालिका व लाईटहाऊस कम्युनिटीज फाउंडेशन यांच्या संयुक्त विद्यमाने राबविण्यात येणारा हा प्रकल्प १८ ते ३५ वयोगटातील शहरी भागातील आर्थिकदृष्ट्या दुर्बल घटकांतील तसेच सुशिक्षित बेरोजगार युवक युवतींसाठी कौशल्य प्रशिक्षण व रोजगारनिर्मितीवर लक्ष केंद्रित करतो.