प्रशासकीय राजवटीतील नवीन विकास आराखडा ठरतोय डोकेदुखी..

• बांधकाम परवानगी असूनही जागेवर टाकलय आरक्षण..
• एकूण ३५० हरकती पालिकेकडे जमा…

न्यूज पीसीएमसी नेटवर्क

पिंपरी (दि. २८ मे २०२५) :- पिंपरी चिंचवड शहराचा नवीन सुधारित प्रारूप विकास आराखडा १४ मे रोजी प्रसिद्ध करण्यात आला आहे. त्याचे नकाशे १६ मेपासून नागरिकांना पाहण्यासाठी उपलब्ध करून देण्यात आले. आराखड्यावर आतापर्यंत ३५० हरकती महापालिकेकडे आल्या. चिखली एचसीएमटीआर प्रकल्पांविरोधात सर्वाधिक हरकती आहेत.

महापालिकेच्या क्षेत्रासह पिंपरी-चिंचवड नवनगर विकास प्राधिकरणाकडून वर्ग केलेल्या एकत्रित प्रारूप विकास आराखडा तयार केला आहे. नकाशा महापालिका भवनातील सभागृहात, खराळवाडी, नियोजन प्राधिकरण कार्यालयात उपलब्ध आहेत.

एमआयडीसी आणि पीएमआरडीएचे क्षेत्र वगळण्यात आले आहे. आराखड्यात शहरातील विविध प्रकल्पांसाठी आरक्षणे टाकण्यात आली आहेत. त्याबाबत नागरिकांकडून १६ मेपासून ६० दिवसांच्या हरकती व सूचना मागविल्या आहेत.

शहरातील अनेक भागांत मोठ्या प्रमाणात विविध आरक्षणे टाकण्यात आली आहेत. काही ठिकाणचे आरक्षण परस्पर रद्द करण्यात आले आहे. बांधकाम परवानगी घेऊनही त्या ठिकाणी आरक्षण टाकल्याचे प्रकार समोर आले आहेत. त्या आरक्षणांना आक्षेप घेत आतापर्यंत एकूण ३५० हरकती महापालिकेकडे आल्या आहेत. त्यात सर्वाधिक हरकती चिखली, एचसीएमटीआर (रिंग रोड) व इतर भागांतील आहेत.