पिंपरी-चिंचवडच्या तरुणांसाठी आम आदमी पक्षाचा मोठा निर्णय..

• तब्बल २०,००० रोजगार निर्मितीची गॅरंटी…

न्यूज पीसीएमसी नेटवर्क

पिंपरी-चिंचवड (दि. २९ ऑगस्ट २०२५) :- पिंपरी-चिंचवड शहरातील युवक-युवतींसाठी रोजगाराच्या नव्या संधी उपलब्ध करून देण्यासाठी आम आदमी पक्षाने महत्त्वपूर्ण निर्णय घेतला आहे. शहरात लवकरच स्टार्टअप्स आणि महापालिकेच्या माध्यमातून तब्बल २०,००० रोजगार निर्माण करण्यात येणार असल्याची घोषणा आम आदमी पक्षाचे शहराध्यक्ष रवीराज बबन काळे यांनी केली.

काळे म्हणाले की, “रोजगार हा प्रत्येक तरुणाचा मूलभूत हक्क आहे. आत्मनिर्भरतेसाठी संधी निर्माण करणे हे आम आदमी पक्षाचे प्राधान्य आहे.”

औद्योगिक नगरी असलेल्या पिंपरी-चिंचवडमध्ये कौशल्याधारित रोजगाराच्या संधी विपुल प्रमाणात आहेत, मात्र अद्याप स्थानिक तरुणांना योग्य न्याय मिळालेला नाही. त्यामुळे शहरातील कौशल्यविकास, स्टार्टअप संस्कृती आणि महापालिकेच्या सहकार्याने रोजगार केंद्र उभारले जाणार असल्याचे त्यांनी स्पष्ट केले.

“शहरात २०,००० नवीन रोजगार निर्माण झाल्याने तरुण-तरुणींना स्वाभिमानाने जगण्याचा आधार मिळेल,” असेही काळे म्हणाले.

आम आदमी पक्षाच्या दिल्ली व पंजाबमधील यशस्वी शासनाचा दाखला देत, पिंपरी-चिंचवडमध्येही पारदर्शक आणि विकासाभिमुख कारभार करून युवकांसाठी नवीन दारे खुली करण्याचे आश्वासन यावेळी देण्यात आले.