न्यूज पीसीएमसी नेटवर्क
पिंपरी (दि. १० सप्टेंबर २०२५) :- चिखली कुदळवाडी सर्कल येथे भरधाव वेगात आलेल्या अज्ञात वाहनाने दुचाकीला जोरदार धडक दिल्याने झालेल्या अपघातात एक तरुण जागीच ठार झाला, तर त्याची पत्नी गंभीर जखमी झाली. ही घटना सोमवारी (दि. ८ सप्टेंबर) रात्री साडेनऊच्या सुमारास घडली.
फिर्यादी शंकर देवासी (रा. पुनावळे, पुणे) यांनी पोलिसात दिलेल्या तक्रारीनुसार, त्यांचा भाऊ रेवैताराम देवासी (वय ३२, रा. डुडुळगाव) व त्यांची पत्नी संतोषदेवी (वय २९) हे दुचाकीवरून पुनावळे येथे जात होते. दरम्यान, कुदळवाडी सर्कल येथे एका अज्ञात वाहनाने भरधाव व निष्काळजीपणे गाडी चालवत त्यांच्या दुचाकीला धडक दिली.
या अपघातात रेवैताराम यांच्या डोक्यास व कानाला गंभीर दुखापत होऊन ते जागीच ठार झाले, तर पत्नी संतोषदेवी यांच्या डोक्याला व उजव्या हाताला गंभीर दुखापत झाली. तसेच दुचाकीचे मोठे नुकसान झाले. धडक दिल्यानंतर वाहनचालक अपघातस्थळावरून पीडितांना मदत न करता फरार झाला.
या प्रकरणी चिखली पोलीस ठाण्यात अज्ञात वाहनचालकाविरुद्ध भारतीय न्याय संहिता तसेच मोटार वाहन कायदा अन्वये गुन्हा नोंदविण्यात आला आहे. पुढील तपास पोलीस हवालदार पाषाणकर करीत आहेत.
न्यूज पीसीएमसी Whatsapp Share करीता आपला मो.नं.रजिस्टर करा.