गरजू महिलांना दिवाळीचा शिधा वाटप..

• प्रतिभा नारी महिला बचत गट व सुदर्शन स्पोर्ट्स क्लब मित्र मंडळाचा उपक्रम…

न्यूज पीसीएमसी नेटवर्क

चिंचवड, (दि. १५ ऑक्टोबर २०२५) :- दिवाळी सण सर्वत्र आनंदात साजरा करण्यासाठी प्रत्येक कुटुंबाला आनंदाचा वाटा मिळावा, या हेतूने पिंपरी येथील गांधीनगर व खराळवाडी परिसरातील दीडशे गरजू महिलांना दिवाळी शिधा किटचे वाटप करण्यात आले. साखर, तेल, मैदा, रवा आणि डाळीचे पीठ असलेल्या या किटचे वितरण प्रतिभा नारी महिला बचत गट आणि सुदर्शन स्पोर्ट्स क्लब मित्र मंडळाच्या संयुक्त पुढाकारातून करण्यात आले.

या उपक्रमाचा उद्देश तळागाळातील महिलांपर्यंत सणाचा आनंद पोहोचवणे हा होता. कार्यक्रमाचे आयोजन पिंपरीतील प्रतिभा नारी महिला बचत गटाच्या अध्यक्षा रजिना फ्रान्सिस यांच्या संकल्पनेतून करण्यात आले. या कार्यक्रमात सुदर्शन स्पोर्ट्स क्लब मित्र मंडळाचे अध्यक्ष सचिन शिंगे, ज्येष्ठ पत्रकार नंदकुमार जाधव, भूषण नांदूरकर, चिंचवड प्रवासी संघाचे अध्यक्ष गुलाम अली भालदार, माजी नगरसेविका उषा गजभार (चोरडिया), योगशिक्षिका सरिता अग्रवाल, जनमन सोशल फाउंडेशनच्या अध्यक्षा श्वेता कापसे, बहुजन विकास आघाडीचे पुणे जिल्हा अध्यक्ष धनंजय घोलप आणि समाजसेविका राखी धर यांच्या हस्ते शिधा वाटप करण्यात आले.

या वेळी उपस्थित मान्यवरांनी आपले मनोगत व्यक्त करत सामाजिक बांधिलकी आणि संवेदनशीलतेचा आदर्श घालून दिला. त्यांनी सांगितले की, “सणांचा आनंद हा केवळ श्रीमंत वर्गापुरता मर्यादित नसावा, समाजातील प्रत्येक घटकाला तो अनुभवता आला पाहिजे. या उपक्रमातून समाजातील परस्पर सहकार्य आणि एकात्मतेचा सुंदर संदेश दिला जात आहे.”

कार्यक्रमाची प्रस्तावना अध्यक्षा रजिना फ्रान्सिस यांनी केली. सूत्रसंचालन सचिन शिंगे यांनी तर संयोजन महिला बचत गटाच्या उषा लष्करे, कमल कलापुरे, वैशाली मिडघुले आणि मंदा दौंडकर यांनी केले.

या उपक्रमामुळे परिसरातील महिलांच्या चेहऱ्यावर आनंद फुलला. दिवाळीचा उत्सव सर्वांसाठी प्रकाश आणि समाधान घेऊन यावा, यासाठी राबविण्यात आलेला हा सामाजिक उपक्रम प्रेरणादायी ठरला आहे.