नेहरूनगर येथील स्क्रॅप यार्डला भीषण आग…

न्यूज पीसीएमसी नेटवर्क

पिंपरी, (दि. १५ ऑक्टोबर २०२५) :- पिंपरी चिंचवड शहरातील नेहरूनगर येथील अण्णासाहेब मगर स्टेडियमजवळील भंगार साहित्याच्या गोदामाला (स्क्रॅप यार्ड) आज सकाळी सुमारास अचानक आग लागली. या घटनेची माहिती मिळताच पिंपरी चिंचवड महापालिकेच्या अग्निशमन दलाने घटनास्थळी धाव घेत अवघ्या काही वेळात आग नियंत्रणात आणली. सुदैवाने, या घटनेत कोणतीही जीवितहानी झालेली नाही, अशी माहिती अग्निशमन विभागातून देण्यात आली.

अग्निशमन विभागाच्या मुख्य नियंत्रण कक्षाला आग लागल्याची माहिती मिळताच अग्निशमन दलाच्या १० वाहनांसह पथके घटनास्थळी दाखल झाली. या पथकांनी समन्वय साधत आगीवर नियंत्रण मिळवले आणि अखेरीस ती पूर्णपणे विझवण्यात यश मिळवले. लाकूड आणि प्लास्टिकच्या वस्तू असल्याने आग झपाट्याने पसरली होती, मात्र अग्निशमन जवानांच्या तत्परतेमुळे मोठी दुर्घटना टळली.

दरम्यान, नागरिकांनी आपल्या परिसरातील टेरेस, बाल्कनी, पार्किंग, बेसमेंट किंवा इतर ठिकाणी ज्वलनशील साहित्य साठवून न ठेवता त्याची योग्य विल्हेवाट लावावी, असे आवाहन महापालिकेच्या अग्निशमन विभागाकडून करण्यात आले आहे.

 प्रदीप जांभळे पाटील, अतिरिक्त आयुक्त, पिंपरी चिंचवड महापालिका…
“गोदामाला आग लागल्याची माहिती मिळताच अग्निशमन दलाने तत्परतेने प्रतिसाद देत अवघ्या काही वेळात आग पूर्णपणे नियंत्रणात आणली. या घटनेत कोणतीही जीवितहानी झाली नाही. नागरिकांनी अशा आपत्कालीन घटनांबाबत तातडीने माहिती दिल्यास मोठी दुर्घटना टाळता येऊ शकते.”

उमेश ढाकणे, सहाय्यक आयुक्त, पिंपरी चिंचवड महापालिका…
“नेहरूनगर येथील स्क्रॅप यार्डमधील आग झपाट्याने पसरत होती, मात्र आमच्या प्रशिक्षित जवानांनी धैर्य आणि तत्परतेने आग नियंत्रणात आणली. यामुळे कोणतीही जीवितहानी झाली नाही.”

 ऋषिकांत चिपाडे, उप अग्निशमन अधिकारी, पिंपरी चिंचवड महापालिका…
“आग लागल्याची माहिती मिळताच आम्ही तात्काळ घटनास्थळी पोहोचलो. लाकूड आणि प्लास्टिकमुळे आग झपाट्याने पसरली होती. मात्र सर्व अग्निशमन पथकांनी सर्व दिशांनी पाण्याचे फवारे मारून आगीचे प्रमाण नियंत्रणात आणले आणि ती पूर्णतः विझवण्यात यश मिळवले.”