कोविड रुग्णालयात उपचारासाठी लाख रुपये घेणारे तीन डॉक्टर गजाआड..

• पिंपरी चिंचवड पोलिसांची मोठी कारवाई…

न्यूज पीसीएमसी नेटवर्क

पिंपरी (दि. ०२ मे. २०२१) :- ऑटो क्‍लस्टर येथील कोविड रुग्णालयात दाखल करण्यासाठी २३ एप्रिल रोजी पहाटे सुरेखा अशोक वाबळे (रा. रामदास नगर, चिखलीगाव) यांना आणले होते. या रुग्णालयात दाखल करण्यासाठी कोणत्याही प्रकारचे शुल्क नसताना आरोपींनी सुरेखा यांच्या नातेवाइकांकडून बेड मिळवून देण्याच्या उद्देशाने धमकावून ऍडमिट करण्यासाठी पैसे लागतात, असे सांगून एक लाख रुपये घेतले व त्यांची फसवणूक केली.

सुरेखा यांच्या नातेवाईकांकडून आरोपी डॉ. प्रवीण जाधव याने एक लाख रुपये घेतले. त्यातील कट प्रॅक्‍टीस म्हणून वीस हजार रुपये पद्‌मजा हॉस्पिटलचे दोन्ही डॉक्‍टरांना दिले. उपचारादरम्यान सुरेखा यांचा मृत्यू झाला. यानंतर हे प्रकरण भाजपाचे नगरसेवक कुंदन गायकवाड व विकास डोळस यांनी उघडकीस आणले होते. तर शुक्रवारी झालेल्या सर्वसाधारण सभेत यावरून बराच गदारोळ झाला होता. आयुक्तांनी या प्रकरणाची दखल घेत चौकशी करून कारवाई करावी, असा तक्रार अर्ज दिला होता.

पिंपरी-चिंचवड महानगरपालिकेचे अतिरिक्‍त आयुक्‍त उल्हास जगताप (वय ५५, रा. चिंचवड) यांनी रविवारी (दि. २) याबाबत पिंपरी पोलीस ठाण्यात फिर्याद दिली आहे. त्यावरून तिघांना अटक करण्यात आली आहे. स्पर्श प्रा. लि. चे डॉ. प्रवीण जाधव, वाल्हेकवाडी येथील पद्‌मजा हॉस्पिटलचे डॉ. शशांक राळे आणि डॉ. सचिन कसबे अशी अटक करण्यात आलेल्या आरोपींची नावे आहेत.