पुरातन नाणं विकण्याच्या तयारीतील आरोपींच्या पोलिसांनी आवळल्या मुसक्या..

• नऊ जणांना अटक; लाखोंचा माल हस्तगत…

न्यूज पीसीएमसी नेटवर्क

पिंपरी (दि. ११. जून २०२१) :- पुरातन काळातील धातूचे नाणे (लिबो कॉईन) ज्यात हाय इरिडियम नावाचे केमिकल आहे. त्यामुळे त्याला मार्केटमध्ये दहा कोटी रुपयांची किंमत आहे, असे भासवून नऊ जणांच्या टोळीने एका होमगार्डला ते नाणे विकण्याचा प्रयत्न केला.

पोलिसांनी त्या नऊ जणांवर कारवाई करीत रोख सात लाख, पुरातन काळातील नाणे, एक लाख १९ हजार ५०० रुपये किमतीचे नऊ मोबाईल फोन, आठ लाख ५० हजार रुपये किमतीच्या दोन कार असा मुद्देमाल जप्त केला आहे. ही कारवाई गुरुवारी (दि. १०) दुपारी खंडोबामाळ, आकुर्डी येथे करण्यात आली.

याबाबत पोलीस नाईक कंठय्या गुरय्या स्वामी यांनी निगडी पोलीस ठाण्यात फिर्याद दिली आहे. त्यानुसार हरीश परशुराम पाटील (वय ६८, रा. औरंगाबाद), संजय अर्जुन कुचेकर (वय ४२, रा. खराडी, पुणे), सुजित राजेंद्र सारफळे (वय २१, रा. उस्मानाबाद), प्रमोद रामचंद्र बचाटे (वय ४०, रा. उस्मानाबाद), राजेश विजयकुमार गोवर्धन (वय ४१, रा. उस्मानाबाद), रत्नाकर विजय सावंत, किशोर ज्ञानेश्वर भगत (वय ३६, दोघे रा. गोपाळनगर, डोंबिवली पूर्व), इमरान हसन खान (वय ४३, रा. शिवाजीनगर, गोवंडी, मुंबई) अशी अटक केलेल्या आरोपींची नावे आहेत. निगडी पोलीस तपास करीत आहेत.