शहरातील तीन तलावांच्या पुनरुज्जीवन व सुशोभिकरणासाठी सतरा कोटींचा खर्च..

न्यूज पीसीएमसी नेटवर्क

पिंपरी (दि. ०५ जुलै २०२३) :- पिंपरी-चिंचवड महापालिकेच्या पर्यावरण विभागाकडून संभाजीनगर, चिंचवड येथील बर्ड व्हॅली खाण, भोसरी तलाव आणि निगडी प्राधिकरणातील गणेश तलाव या तीन तलावांचे पुनरुज्जीवन व सुशोभिकरण करण्यात येणार आहे. त्यासाठी सुमारे १७ कोटी २२ लाख ६ हजार ७४८ रुपयांचा खर्च अपेक्षित आहे.

बर्ड व्हॅली, भोसरी तलाव व गणेश तलाव या तीन तलावांचे पुनरुज्जीवन व सुशोभिकरण करण्याचे काम १५ व्या वित्त आयोगांतर्गत केले जाणार आहे. त्यासाठी पालिकेच्या पर्यावरण अभियांत्रिकी विभागाकडून सर्व खर्चासहित १६ कोटी ५५ लाख ८३ हजार ४१२ रुपये इतक्या खर्चाची निविदा काढण्यात आली होती. त्यात पाच ठेकेदारांनी निविदा भरल्या होत्या. त्यापैकी डब्ल्यूटीई इन्फा प्रोजेक्ट्स प्रा. लि. या ठेकेदार कंपनीची निविदा दरापेक्षा ४ टक्के जास्त दराची निविदा पात्र ठरली आहे.

डब्ल्यूटी इन्फ्रा प्रोजेक्ट्सची एकूण १७ कोटी २२ लाख ६ हजार ७४८ रुपयांची निविदा पर्यावरण विभागाने स्वीकृत केली. ठेकेदाराला काम देण्यास व खर्च करण्याचा प्रस्तावास आयुक्त तथा प्रशासक शेखर सिंह यांनी नुकतीच  स्थायी समितीची मान्यता दिली. बर्ड व्हॅली खाण, भोसरी तलाव आणि निगडी प्राधिकरणातील गणेश तलावांचे पुनरुज्जीवन करून परिसराचे नैसर्गिकरित्या सुशोभिकरणाचे काम करण्यात येणार आहे.