न्यूज पीसीएमसी नेटवर्क
पिंपरी (दि. ०५ जून २०२४) :- पीएमपी प्रशासनाने पिंपरी चिंचवड शहरासह पुणे आणि आजूबाजूच्या धार्मिक आणि पर्यटनासाठी पाचशे रुपयांमध्ये दिवसभर वातानुकुलित इलेक्ट्रोक बसमधून फिरण्यासाठी सुविधा उपलब्ध करून देण्यात आली आहे. प्रत्येक आठवड्याच्या शनिवार, रविवार व सार्वजनिक सुट्टीच्या दिवशी ही पर्यटन बससेवा उपलब्ध आहे.
महाराष्ट्राचे आराध्य दैवत श्री खंडोबा जेजूरी व अष्टविनायक पैकी मयुरेश्वर मोरगाव, चिंतामणी थेऊर, महागणपती रांजणगांव तसेच पुणे, पिंपरी चिंचवड शहर व लगतच्या पुणे महानगर प्रदेश विकास प्राधिकरणाच्या कार्यक्षेत्रातील विविध धार्मिकस्थळे, तीर्थस्थळांचे दर्शन घेण्याकरिता व पर्यटन स्थळास भेट देण्याकरिता मोठ्या प्रमाणात भक्तगण, भाविक व पर्यटक प्रवासी येत असतात.
प्रत्येक आठवड्याच्या शनिवारी व रविवारी साप्ताहिक सुट्टी असल्याने प्रवाशांचा प्रतिसाद जास्त असतो. या प्रवाशांचा प्रवास आरामदायी, सुलभ व माफक दरात होणेच्या दृष्टीने पुणे महानगर परिवहन महामंडळाच्या पुणे दर्शन बससेवेच्या धर्तीवर धार्मिक व पर्यटन स्थळांकरिता वातानुकूलीत ई-बसद्वारे विशेष बससेवा प्रत्येक आठवड्याच्या शनिवार, रविवार व सार्वजनिक सुट्टीच्या दिवशी १ मे २०२३ पासून सुरू करण्यात आली आहे.
पिंपरी चिंचवड शहरातून भक्ती शक्ती निगडी, अप्पूघर, इस्कॉन मंदिर (रावेत), मोरया गोसावी मंदिर (चिंचवड), प्रतिशिर्डी (शिरगांव), देहूगाव, गाथा मंदिर, आळंदी, भक्ती शक्ती निगडी अशी दिवसभर सुविधा असून बस सकाळी ९ वाजता सुटेल. तर, सायंकाळी ६.२० वाजता बस परत येईल. बसचा पहिला व शेवटचा थांबा निगडी भक्ती शक्ती बसस्थानक असणार असून तिकीट दर प्रति प्रवासी ५०० रुपये असणार आहे.
बसेसच्या आसन क्षमतेनुसार पूर्ण ३३ प्रवाशांचे ग्रुप तिकीट काढल्यास ५ प्रवाशांच्या तिकीट दरामध्ये १०० टक्के सवलत. परिवहन महामंडळाच्या डेक्कन जिमखाना, पुणे स्टेशन, स्वारगेट, कात्रज, हडपसर गाडीतळ, भोसरी, बसस्थानक, निगडी, मनपा भवन पास केंद्रांवर तिकिट बुकींग. अल्प प्रतिसाद किंवा काही अपरिहार्य कारणास्तव सदरची बससेवा रद्द झाल्यास प्रवाशांना पुढील आठवड्यात प्रवास करण्याची मुभा. ज्या दिवशी बुकींग केले असेल त्या दिवशी संबंधित प्रवाशास राहत्या घरापासून बस सुटण्याच्या ठिकाणापर्यंत व सायंकाळी पोहचल्यानंतर त्यांना त्यांच्या राहत्या घरापर्यंत सदरील तिकिटावर अन्य मार्गाच्या बसेसमधून प्रवास करण्याची मुभा या सवलती आहेत.
प्रत्येक आठवड्याच्या शनिवार, रविवार व सार्वजनिक सुट्टीच्या दिवशी सिंहगड रोडवरील कृष्णाई वॉटर पार्क व लोणावळा रोडवरील इमेजिका वॉटर पार्क येथे जाणाऱ्या प्रवाशांच्या सोयीकरीता परिवहन महामंडळामार्फत प्रासंगिक करारावर बसेस देण्यात येतात. सदरच्या बुकिंग करीता ०२०-२४५०३३०० या क्रमांकावर संपर्क साधावा, तसेच पर्यटन बससेवेचा लाभ निसर्गप्रेमी पर्यटक व भाविकांनी घ्यावा, असे आवाहन करण्यात आले आहे.