‘श्री संत संताजी जगनाडे महाराज’ मंदिराचं स्मारक अतिशय देखणं करू – अजित पवार..

• सुदुंबरेत जगनाडे महाराजांच्या स्मारकाचे उपमुख्यमंत्र्यांच्या हस्ते भूमिपूजन संपन्न… 

न्यूज पीसीएमसी नेटवर्क

सुदुंबरे (दि. ०४ ऑक्टोबर २०२४) :- संत जगनाडे महाराज यांनी जगद्गुरू संत तुकाराम महाराजांची गाथा लिहिली. त्यामुळे तिचा प्रसार झाला. त्यांचे स्मारकाचे काम हाती घेतले आहे. सुदुंबरे गावातील श्री संत संताजी जगनाडे महाराज मंदिराचं स्मारक अतिशय देखणं करू. हेरीटेजचा दर्जा देऊ. ६६ कोटींच्या खर्चास मंजुरी दिली आहे. त्यासाठी निधी कमी पडला तर आणखी देऊ, अशी घोषणा राज्याचे उपमुख्यमंत्री तथा पुणे जिल्ह्याचे पालकमंत्री अजित पवार यांनी केली.

सुदुंबरे येथील संत संताजी महाराज जगनाडे येथील तीर्थक्षेत्र विकास आराखड्याचा भूमिपूजन सोहळा शुक्रवारी (दि. ०४) रोजी अजित पवार यांच्या हस्ते सुदुंबरे गावात पार पडला. त्यावेळी ते बोलत होते. यावेळी माजी खासदार रामदास तडस, मावळचे आमदार सुनील शेळके, संत जगनाडे महाराज संस्थेचे अध्यक्ष शिवदास उबाळे, विश्वस्त मंडळ, ग्रामस्थ तसेच राज्यभरातून आलेला तेली जनसमुदाय मोठ्या संख्येने उपस्थित होता.

अजित पवार पुढे बोलताना म्हणाले, राज्यातील तेली समाजासाठी आर्थिक विकास महामंडळाची स्थापन करण्याचा निर्णय आज झालेल्या झालेल्या मंत्रिमंडळ बैठकीत घेतला आहे. त्यामुळे तेली समाजातील घटकांची सामाजिक व आर्थिक उन्नती होईल. तसेच युवकांना देखील शिक्षणासाठी फायदा व्हावा यासाठी हे महामंडळ काम करेल. तसेच भर कार्यक्रमातच त्यांनी स्मारकाचं काम उत्तम करण्याचा ठेकेदाराला दम भरला. जगनाडे महाराज यांच्या कार्याला त्यांनी अभिवादन करताच ‘जय संताजी’ चा नारा सर्वत्र गुंजला.

आ. सुनील शेळके म्हणाले, पहिल्या टप्प्यात सुरुवातीला स्मारकासाठी  पाच कोटीचा निधी मंजूर केला. त्यासाठी वास्तू विशारदाकडून मंदिराची रचना बनविली. त्यानंतर ६६ कोटीचा निधी उपलब्ध करून दिला आहे. अजितदादा यांच्या नेतृत्वाखाली जगनाडे महाराज यांचे स्मारक भव्यदिव्य करू, अशी ग्वाही दिली.