लाच स्वीकारताना पालिकेचे दोन कर्मचारी एसीबीने रंगेहाथ पकडले…

न्यूज पीसीएमसी नेटवर्क

पिंपरी (दि. ०८ नोव्हेंबर २०२४) :- पाणीपट्टीचे बिल नियमित काढण्यासाठी एक हजार ६०० रुपयांची लाच स्वीकारताना कर्मचारी महिलेला रंगेहाथ पकडले. तिच्यासह महापालिकेच्या पाणी मीटर निरीक्षकावरदेखील गुन्हा दाखल केला. पुणे लाचलुचपत प्रतिबंधक विभागाने पिंपरी-चिंचवड महापालिकेच्या ‘ह’ प्रभाग कार्यालयात गुरुवारी (दि. ७) ही कारवाई केली.

विकास सोमा गव्हाणे आणि महिला कर्मचारी यांच्याविरोधात दापोडी पोलिस ठाण्यात गुन्हा दाखल करण्यात आला. विकास गव्हाणे हे पिंपरी चिंचवड महापालिकेच्या ‘ह’ प्रभाग कार्यालयात पाणी मीटर निरीक्षक (वर्ग ३) म्हणून कार्यरत आहेत. तसेच महिला कर्मचारी ही कंत्राटी कॉम्प्युटर ऑपरेटर आहे.

याप्रकरणी ५८ वर्षीय व्यक्तीने पुणे लाचलुचपत प्रतिबंधक विभागाकडे (एसीबी) तक्रार केली होती. महापालिकेच्या पाणीपट्टीचे बिल सरासरी येत असल्याने ते बिल नियमित काढण्यात यावे, अशी मागणी तक्रारदाराने केली होती. जितका वापर होईल तितक्याच पाण्याचे बिल काढण्यासाठी विकास गव्हाणे याने स्वतःसाठी एक हजार रुपये, तर आशा चौपाली हिच्यासाठी सहाशे रुपये लाचेची मागणी केली. याबाबत तक्रारदार व्यक्तीने एसीबीकडे तक्रार केली.