नवनियुक्त आमदारांचा पहिल्याच बैठकीत कामांचा झपाटा…

• विकासकामांना गती देत कामे त्वरित मार्गी लावण्याचे आ. सुनील शेळके यांचे अधिकाऱ्यांना आदेश..

न्यूज पीसीएमसी नेटवर्क

तळेगाव दाभाडे(दि. १३ डिसेंबर २०२४) :-  ज्या कामांना निधी उपलब्ध आहे अथवा जी कामे अर्धवट अवस्थेत आहेत, त्या कामांना गती देऊन कामे पूर्ण करावीत, असे आदेश आमदार सुनील शेळके यांनी अधिकाऱ्यांना दिले.

महसूल विभाग, सार्वजनिक बांधकाम विभाग, जलसंपदा विभाग, वन विभाग, महावितरण आणि पंचायत समितीच्या अंतर्गत असणाऱ्या सर्व विभागांची आढावा बैठक आमदार शेळके यांच्या प्रमुख उपस्थितीत वडगाव मावळ येथे झाली. यावेळी जलजीवन मिशन पाणीपुरवठा योजना, शाळा दुरुस्ती, शासकीय योजनांची अंमलबजावणी, रस्ते, स्मशानभूमी, पूल या कामांचा सविस्तर आढावा घेण्यात आला.

या बैठकीस तहसीलदार विक्रम देशमुख, नायब तहसीलदार गणेश तळेकर, गटविकास अधिकारी के. के. प्रधान, गणेश ढोरे, माजी सभापती विठ्ठलराव शिंदे, साहेबराव कारके, सहायक गटविकास अधिकारी एस. डी. थोरात, पोलिस निरीक्षक सुहास जगताप, प्रदीप रायण्णावर, रणजित जाधव, विजय वाघमारे, कुमार कदम, रवींद्र पाटील, तेजस्विनी कदम तसेच सर्व विभागाचे प्रमुख अधिकारी, ग्रामसेवक, मंडल अधिकारी उपस्थित होते.

वडेश्वर येथे नवीन वीज उपकेंद्र उभारण्यासाठी निधी उपलब्ध झाला आहे. या कामास सुरुवात करण्यात यावी. कोल्हापूरी पद्धतीचे बंधारे व पुलांची कामे करून पूल वाहतुकीस खुले करावेत. जुन्या बंधाऱ्यातील पाणी गळती रोखण्यासाठी दुरुस्तीचे प्रस्ताव द्यावेत, असे आदेश देण्यात आले आहेत.

सरत्या वर्षाला निरोप देण्यासाठी मावळ तालुक्यात मोठ्या प्रमाणावर पर्यटक येत असतात. स्थानिक हॉटेल्स व छोटे व्यावसायिक पर्यटकांवर अवलंबून असल्याने त्यांचे नुकसान होणार नाही, याची प्रशासनाने काळजी घ्यावी. कुठेही कायदा व सुव्यवस्थेचा प्रश्न निर्माण होणार नाही. याबाबत स्थानिक व्यावसायिक, नागरिक व पर्यटक यांना दक्षता घेण्याचे आवाहन करावे, अशा सूचना पोलिस यंत्रणेला दिल्या. कामशेत, वडगाव फाटा, देहूरोड, सोमाटणे, लोणावळा येथील वाहतूक कोंडी सोडविण्यासाठी ठोस पावले उचलावीत, असे आदेश वाहतूक विभागाला दिले.