दहावी आणि बारावी परीक्षेसाठी पाच भरारी पथकाची नेमणुक..

• गैरप्रकार आढळल्यास थेट गुन्हा दाखल होणार; पालिका आयुक्तांची माहिती…

न्यूज पीसीएमसी नेटवर्क

पिंपरी (दि. ११ फेब्रुवारी २०२५) :- पिंपरी चिंचवड महानगरपालिका माध्यमिक शिक्षण विभागाच्या वतीने माध्यमिक व उच्च माध्यमिक शालांत परीक्षा परीक्षा केंद्रांवर कॉपीमुक्त, भयमुक्त व निकोप वातावरणामध्ये परीक्षा पार पाडण्यासाठी सहाय्यक आयुक्त, माध्यमिक शिक्षण विभाग व शिक्षणाधिकारी, माध्यमिक शिक्षण विभाग यांच्या नियत्रंणाखाली पाच भरारी पथकाची नेमणुक करण्यात आलेली आहे.

या भरारी पथकांमार्फत मनपा हद्दीतील संवेदनशील व असंवेदनशील परीक्षा केंद्रांवर प्रत्यक्ष भेटी देऊन काही गैरप्रकार होऊ नये याची दक्षता घेतली जाणार आहे.

पिंपरी चिंचवड मनपा हद्दीमध्ये एच.एस.सी बोर्ड परीक्षेकरीता एकुण ३३ परीक्षा केंद्रे असुन २५७०० विदयार्थी व एस.एस.सी बोर्ड परीक्षेकरीता एकुण ४८ परीक्षा केंद्रे असुन २८५०० विदयार्थी प्रविष्ठ झालेले आहेत. तसेच पिंपरी चिंचवड मनपा अंतर्गत कार्यरत असणाऱ्या १८ माध्यमिक विदयालयातील मराठी माध्यमाचे २३०० विदयार्थी व उर्दू माध्यमाचे ५०० असे एकुण २८०० विदयार्थी एस.एस.सी बोर्ड परीक्षेकरीता प्रविष्ठ झालेले आहेत.

सर्व परीक्षा केंद्रांच्या केंद्राध्यक्षांना प्रत्येक परीक्षा हॉलमध्ये सी.सी.टी.व्ही कॅमेरे लावण्यासंदर्भात सुचना देण्यात आलेल्या आहेत. ज्या केंद्रावरती गैरप्रकार घडतील किंवा गैरप्रकाराला उद्युक्त करणारे तसेच प्रत्यक्ष-अप्रत्यक्ष गैरमार्गाचा वापर करणाऱ्यांवर महाराष्ट्र Prevention of malpractices act. 1982 अंतर्गत दखलपात्र व अजामीनपात्र गुन्हा दाखल करण्यात येणार आहे, अशी माहिती महापालिका आयुक्त शेखर सिंह यांनी दिली.