म्यूल अकाउंट हॅन्डलर आणि त्याचा साथीदार मीरा-भाईंदरमधून अटक..

• सायबर पोलिसांची कारवाई…

न्यूज पीसीएमसी नेटवर्क

पिंपरी (दि. २७ फेब्रुवारी २०२५) :- ट्रेडिंगमध्ये गुंतवणूक केल्यास जास्त नफा होतो, असे सांगून एकाची एक कोटी १३ लाखांची फसवणूक केली. याबाबत पिंपरी-चिंचवड सायबर पोलीस ठाण्यात जानेवारी २०२५ मध्ये गुन्हा दाखल केल्यानंतर सायबर पोलिसांनी या प्रकरणातील म्यूल अकाउंट हॅन्डलर आणि त्याच्या साथीदाराला मीरा-भाईंदर मधून अटक केली.

मितेश राजूभाई व्होरा (वय ३४), केपिन अजितकुमार मेहता (वय ४१, दोघेही रा. अहमदाबाद, गुजरात) अशी अटक केलेल्या आरोपींची नावे आहेत. मितेश हा गुजरातमधून म्यूल अकाउंट घेऊन केपिन याला पाठवत होता. केपिन हा फसवणुकीची रक्कम अशा म्यूल अकाउंटवर घेत होता. आरोपींनी फॉरेक्स ट्रेडिंगमध्ये गुंतवणूक केल्यास चांगला नफा मिळेल, असे आमिष फिर्यादी यांना दाखविले आणि एक कोटी ३० लाख २३ हजार ५१५ रुपये घेतले.

फिर्यादीचा विश्वास बसण्यासाठी त्यांना काही रक्कम परत केली. मात्र एक कोटी १२ लाख ९६ हजार ३८० रुपये परत न करता त्यांची फसवणूक केली. पोलिसांनी तांत्रिक विश्लेषणात आरोपी अहमदाबाद गुजरात येथे असल्याचे समजले. म्यूल अकाउंटमधील पैसे रोख स्वरूपात बँकेतून काढणारा मितेश व्होरा याला पोलिसांनी अटक केली. त्यानंतर त्याचा साथीदार मीरा भाईंदर येथे आला असल्याची माहिती मिळाल्याने पोलिसांनी केपिन मेहता याला मीरा-भाईंदर मधून अटक केली. या गुन्ह्यात आणखी आरोपींचा सहभाग असल्याचे निष्पन्न झाले आहे.

ही कारवाई पोलीस निरीक्षक रविकिरण नाळे, सहायक निरीक्षक प्रवीण स्वामी, उपनिरीक्षक सागर पोमण, वैभव पाटील, प्रकाश कातकाडे, पोलीस अंमलदार हेमंत खरात, दीपक भोसले, श्रीकांत कबुले, स्वप्नील खणसे, नितेश बिच्चेवार, अतुल लोखंडे, सौरभ घाटे, सुरज शिंदे, जयश्री माळी, सरिता तुपे, शुभांगी ढोबळ, धरती वाडेकर, ईश्वरी आंबरे, वैशाली बर्गे, धनश्री प्रधान, मोनिका बिच्चेवार, दीपाली चव्हाण यांनी केली.