शनिवार आणि रविवारी पालिकेची  कर संकलन  कार्यालये खुली राहणार…

न्यूज पीसीएमसी नेटवर्क

पिंपरी (दि. १३ मार्च २०२५) :- पिंपरी चिंचवड महानगरपालिकेला शनिवार आणि रविवार सुट्टी असली तरी ३१ मार्चपर्यंत या दोन्ही दिवशी कर संकलन कार्यालये सुरुच ठेवण्यात येणार आहेत. नागरिकांच्या सोयीसाठी कर भरण्यासाठी वेळ वाढविण्यात आली आहे. दि. ३१ मार्चपर्यंत सकाळी ९.४५ ते सायंकाळी ५.४५ वाजेपर्यंत कॅश काऊंटर सुरू ठेवण्यात येणार आहेत. याचा नागरिकांनी लाभ घ्यावा असे आवाहन सहाय्यक आयुक्त अविनाश शिंदे यांनी केले आहे.

पिंपरी चिंचवड महानगरपालिकेच्या कर आकारणी व कर संकलन विभागाच्या वतीने कर वसुलीची कार्यवाही सुरु आहे. पिंपरी चिंचवड महानगरपालिकेच्या अर्थसंकप्लातील उद्दिष्टाप्रमाणे कर वसुली दि. ३१ मार्च २०२५ पुर्वी करणेची असून उपरोक्त उद्दिष्ट्यपुर्ततेकरीता केवळ १८ दिवसाचा कालावधी शिल्लक आहे. हीच बाब लक्षात घेऊन

पिंपरी चिंचवड महानगरपालिकेची मुख्य कार्यालय तसेच १८ विभागीय कर संकलन कार्यालय यापुढे शनिवार व रविवार चालू ठेवणेचा महत्वपूर्ण निर्णय घेण्यात आला आहे. यामुळे नागरिकांना सार्वजनिक सुट्टीच्या दिवशी तसेच शनिवारी व रविवारी कर भरता येईल.

पिंपरी-चिंचवड शहरात मालमत्ता धारकांना कर भरण्यासाठी १८ विभागीय कार्यालये कार्यान्वीत असून कराचा भरणा करण्यासाठी ऑनलाइन पध्दतीने कर भरण्याची सुविधा विभागीय कर संकलन कार्यलयामध्ये उपलब्ध करून देण्यात आलेली आहे.

नागरिकांना कर भऱण्याचे आवाहन करण्यासाठी करसंकलन विभागाकडून टेलिकॉलिंगच्या माध्यमातून आवाहन केले जात आहे. नागरिकांनी शनिवारी व रविवारी महानगरपालिकेकडून ८८८८००६६६६ सदर क्रमांकावरुन आलेले फोन अधिकृत असून त्याचबरोबर, @CP-PCMCPT @CP-PCMCWT या हॅंडलवरुन आलेले एस.एम.एस अधिकृत समजावेत. असे कर संकलन विभागाकडून सांगण्यात आले आहे.