महापालिकेच्या ‘अंदाजपत्रकात नागरिकांचा सहभाग’ उपक्रमास प्रतिसाद…

न्यूज पीसीएमसी नेटवर्क 

पिंपरी, (दि. १२ सप्टेंबर २०२५) :- पिंपरी चिंचवड महापालिकेच्या २०२६-२७ च्या अर्थसंकल्पासाठी सुरू असलेल्या ‘अंदाजपत्रकात नागरिकांचा सहभाग’ या उपक्रमाला यंदा मोठा प्रतिसाद मिळत आहे. आतापर्यंत २ हजार ७०० पेक्षा जास्त नागरिकांनी अभिप्राय नोंदवले आहेत. मागील वर्षी २ हजार २७९ नागरिक सहभागी झाले होते. या वर्षी अधिक सहभाग मिळाल्याने नागरिकांचा विश्वास अधोरेखित झाला आहे.

महापालिका आयुक्त तथा प्रशासक शेखर सिंह यांच्या हस्ते १५ ऑगस्ट रोजी या उपक्रमाचा शुभारंभ झाला होता. नागरिक रस्त्यांचे नूतनीकरण, फूटपाथ बांधकाम, उद्यान विकास, जलनिस्सारण सुधारणा अशा कामांबाबत सूचना देत आहेत.

मागील वर्षी नागरिकांच्या सूचनांवर आधारित ४९९ कामांसाठी १३६ कोटी ९८ लाखांचा निधी तरतूद करण्यात आला होता. यंदाही नागरिकांना १५ सप्टेंबरपर्यंत अभिप्राय नोंदवण्याची संधी आहे. “हा उपक्रम नागरिकांचा विश्वास आणि सक्रिय सहभाग दर्शवतो,” असे आयुक्त शेखर सिंह यांनी सांगितले.