करसंकलन विभागात २९ कोटींचा गैरव्यवहार?..

• ‘आप’कडून त्रिसदस्यीय चौकशी समितीची मागणी…

न्यूज पीसीएमसी नेटवर्क

पिंपरी-चिंचवड शनिवार, (दि. २७ सप्टेंबर २०२५) :- महानगरपालिकेच्या करसंकलन विभागात ठेकेदारांकडून तब्बल २९ कोटी रुपयांचा गैरव्यवहार झाल्याचा गंभीर आरोप समोर आला आहे. सहा हजारांहून अधिक फाईल्समध्ये बनावट कागदपत्रे सादर करून प्रचंड रकमेचे बिल दाखल करण्यात आले असल्याचे समजते. या संदर्भात बिल अदा करण्याची प्रक्रिया सुरू झाल्याचे वृत्त बाहेर आल्यानंतर नागरिकांमध्ये संताप उसळला आहे.

या प्रकरणी आम आदमी पार्टी पिंपरी-चिंचवडचे शहराध्यक्ष रविराज बबन काळे यांनी आयुक्तांना ईमेलद्वारे निवेदन सादर केले. त्यांनी स्पष्ट केले की, “महानगरपालिकेच्या निधीचा गैरवापर म्हणजे नागरिकांच्या विश्वासाला तडा जाणे होय. ठेकेदारांना २९ कोटी रुपयांचे बिल अदा करणे ही जनतेच्या पैशांची थट्टा आहे. आम्ही तातडीने चौकशीची मागणी करत असून, अन्यथा रस्त्यावर उतरून आंदोलन करू,” असा इशारा त्यांनी दिला.

काळे यांनी या प्रकरणाची निष्पक्ष चौकशी करण्यासाठी त्रिसदस्यीय चौकशी समिती नेमावी. चौकशी पूर्ण होईपर्यंत ठेकेदाराला कोणतेही बिल अदा करू नये. चौकशीचा संपूर्ण अहवाल जनतेसमोर पारदर्शकपणे प्रसिद्ध करावा, अशा प्रशासनासमोर तीन ठोस मागण्या मांडल्या आहेत

त्यांनी पुढे म्हटले की, “महानगरपालिकेतील आर्थिक पारदर्शकता ढासळू देणार नाही. नागरिकांच्या पैशांचा अपव्यय हा विश्वासघात असून, आम आदमी पार्टी त्याविरोधात ठाम भूमिका घेईल.”