शहराच्या शाश्वत विकासासाठी अरविंद केजरीवाल यांना आमंत्रण..

• पिंपरी चिंचवड भेटीची तयारी सुरू; शहराध्यक्ष रविराज काळे यांची माहिती…

न्यूज पीसीएमसी नेटवर्क

पिंपरी | सोमवार, ६ ऑक्टोबर २०२५ :- पिंपरी चिंचवड शहरातील वाढत्या नागरी समस्या, शैक्षणिक व आरोग्यविषयक आव्हानांचा आढावा घेण्यासाठी आणि शहराच्या शाश्वत विकासासाठी मार्गदर्शन मिळावे या उद्देशाने आम आदमी पक्षाचे राष्ट्रीय संयोजक आणि दिल्लीचे मुख्यमंत्री अरविंद केजरीवाल यांना पिंपरी चिंचवडला भेट देण्याचे आमंत्रण देण्यात आले आहे. हे आमंत्रण आम आदमी पार्टी पिंपरी चिंचवडचे शहराध्यक्ष रविराज काळे यांनी अधिकृतरीत्या दिले असून, लवकरच त्यांच्या भेटीचा कार्यक्रम निश्चित होणार असल्याची माहिती त्यांनी दिली.

या पार्श्वभूमीवर रविराज काळे यांच्या ‘कार्य अहवाल’ या पुस्तिकेचे प्रकाशन नुकतेच गोवा येथे अरविंद केजरीवाल यांच्या हस्ते पार पडले. या अहवालात काळे यांनी आपल्या कार्यकाळात केलेल्या जनसेवा, नागरिकांच्या मूलभूत सुविधांसाठी केलेले प्रयत्न, आंदोलनात्मक लढे तसेच सामाजिक-सांस्कृतिक उपक्रमांचे सविस्तर चित्रण केले आहे.

या कार्य अहवालातून विशेषतः प्रभाग क्र. २६ (पिंपळे निलख, विशालनगर) परिसरातील विकासकामे, नागरिकांसाठी घेतलेले उपक्रम, आणि सामाजिक चळवळींचे सचित्र दर्शन घडते.

रविराज काळे म्हणाले, “पिंपरी चिंचवड हे महाराष्ट्रातील सर्वात वेगाने विकसित होणारे शहर आहे. येथील नागरिकांना दर्जेदार शिक्षण, आरोग्यसेवा आणि स्वच्छ प्रशासन मिळावे, हे आमचे ध्येय आहे. दिल्लीतील ‘आप’ मॉडेलप्रमाणे पारदर्शक, नागरिक केंद्रित विकास आराखडे येथे राबविण्यासाठी आम्ही केजरीवाल यांचे मार्गदर्शन घेणार आहोत.”

त्यांनी पुढे सांगितले की, “हा कार्य अहवाल माझ्या वैयक्तिक कार्याचा नव्हे, तर प्रत्येक ‘आप’ कार्यकर्त्याच्या मेहनतीचा पुरावा आहे. आम आदमी पार्टीचा उद्देश लोकशाहीला नागरिकांच्या दारात आणणे आणि विकास प्रक्रियेत जनसहभाग वाढविणे हा आहे.”

पिंपरी, चिंचवड, रहाटणी, पिंपळे निलख आणि विशालनगर परिसरातील कार्यकर्त्यांमध्ये या भेटीबद्दल उत्साहाचे वातावरण आहे. नागरिकांच्या स्थानिक मागण्या आणि शहरातील विकास आराखड्यावर अरविंद केजरीवाल प्रत्यक्ष मार्गदर्शन करणार असल्याने या भेटीची सर्वत्र चर्चा सुरू आहे.