प्रभाग क्रमांक १९ मधून माजी नगरसेवक शैलेश मोरे भाजपचे दावेदार..

• पदाधिकारी, कार्यकर्ते आणि समर्थकांच्या उपस्थितीत शहराध्यक्षांकडे केला अर्ज सुपूर्त…

न्यूज पीसीएमसी नेटवर्क

पिंपरी (दि. १० डिसेंबर २०२५) :- पिंपरी चिंचवड महानगरपालिका सार्वत्रिक निवडणूक २०२६ च्या पार्श्वभूमीवर भारतीय जनता पार्टीमध्ये उमेदवारी अर्ज दाखल करण्याची सुरू असलेली प्रक्रिया वेग घेत आहे. प्रभाग क्रमांक १९ (आनंदनगर–पिंपरी कॅम्प) मधून भाजपचे माजी नगरसेवक शैलेश उर्फ शैलेंद्र प्रकाश मोरे यांनी भाजप शहराध्यक्ष शत्रुघ्न बापू काटे यांच्याकडे अधिकृतरित्या इच्छुक उमेदवारी अर्ज सुपूर्त केला.

अर्ज दाखल करताना पक्षाचे पदाधिकारी, कार्यकर्ते आणि समर्थक मोठ्या संख्येने उपस्थित होते.

प्रभागातील विविध विकासकामे, स्थानिक प्रश्न आणि आगामी निवडणूक रणनीतीबाबत मोरे यांनी पक्ष नेतृत्वासमोर आपली भूमिका मांडली. प्रभाग १९ हा मतदारसंघ राजकीय दृष्ट्या महत्त्वाचा मानला जात असल्याने या उमेदवारीकडे विशेष लक्ष वेधले जात आहे.

प्रभाग १९ मध्ये शैलेश मोरे यांच्या कामाचा ठसा असून ते आधीच लोकप्रतिनिधी राहिलेले आहेत. अनुभवी उमेदवारांना पक्ष प्राधान्य देतो. सध्याच्या परिस्थितीत शैलेश मोरे यांना उमेदवारी मिळण्याची दाट शक्यता आहे. अनुभव, स्थानिक कामाचा आधार, कार्यकर्त्यांचा पाठिंबा आणि प्रभागाचे महत्त्व हे घटक त्यांच्या बाजूने आहेत.