न्यूज पीसीएमसी नेटवर्क
तळेगाव दाभाडे (दि. १७ मार्च २०२६) :- तळेगाव दाभाडे परिसरात निष्काळजीपणामुळे घडलेल्या धक्कादायक अपघातात ११ वर्षीय मुलीचा मृत्यू झाल्याची घटना समोर आली आहे. गॅस डिलिव्हरी वाहन चालकाने हँडब्रेक न लावता वाहन उतारावर उभे केल्याने हे दुर्दैवी प्रकरण घडले.
पोलिसांनी दिलेल्या माहितीनुसार, ही घटना १६ मार्च रोजी दुपारी ३ वाजण्याच्या सुमारास एका सोसायटीसमोर, सोमाटणे गावठाणाकडे जाणाऱ्या रस्त्यावर, चौराईनगर येथे घडली. आरोपींनी गॅस डिलिव्हरी करताना वाहन योग्य प्रकारे सुरक्षित न ठेवता निष्काळजीपणे उभे केले. हँडब्रेक न लावता व गिअरमध्ये न ठेवता वाहन उभे केल्यामुळे ते अचानक पुढे सरकले.
या वेळी ज्ञानेश्वरी गुहे (वय ११) ही मुलगी रस्त्यावर असताना वाहनाने तिला पाठीमागून धडक दिली व तिच्या अंगावरून गेले. या भीषण अपघातात ती गंभीर जखमी झाली आणि तिचा मृत्यू झाला.
घटनेनंतर आरोपींनी जखमी मुलीला कोणतीही वैद्यकीय मदत न करता व पोलिसांना माहिती न देता घटनास्थळावरून पळ काढल्याचेही तक्रारीत नमूद आहे.
या प्रकरणी यश हनुमंत कराळे (वय २२) यांच्या फिर्यादीवरून तळेगाव दाभाडे पोलीस ठाण्यात बुधाराम बिश्नोई व ओमप्रकाश बिश्नोई यांच्यासह संबंधित चालकाविरुद्ध भारतीय न्याय संहिता व मोटार वाहन कायद्यान्वये गुन्हा दाखल करण्यात आला आहे. अद्याप आरोपींना अटक करण्यात आलेली नाही.
या प्रकरणाचा पुढील तपास पोलीस उपनिरीक्षक चव्हाण करीत आहेत.
न्यूज पीसीएमसी Whatsapp Share करीता आपला मो.नं.रजिस्टर करा.