(संपादकीय) महापौरांचा ‘दिल्ली दौरा’ की ‘भोसरीतील भविष्यातील राजकीय समीकरणांची नवी सुरुवात’?..

• दोन वेळा बिनविरोध नगरसेवक ते दिल्लीतील लॉबिंग; पुढचे लक्ष्य विधानसभा?..
• महापौर रवि लांडगे यांच्या अचानक दिल्ली दौऱ्याने राजकीय चर्चांना उधाण…

न्यूज पीसीएमसी नेटवर्क

पिंपरी चिंचवड (दि. २४ जुलै २०२६) :- पिंपरी-चिंचवडचे महापौर रवि लांडगे यांचा नुकताच झालेला दिल्ली दौरा केवळ विकासकामांच्या पाठपुराव्यापुरता मर्यादित होता, की त्यामागे भविष्यातील राजकीय समीकरणांचाही संदेश दडलेला आहे? हा प्रश्न आता राजकीय वर्तुळात चर्चिला जाऊ लागला आहे.

महापौर म्हणून केंद्र सरकारच्या मंत्र्यांना भेटून शहरातील प्रश्न मांडणे हे त्यांच्या अधिकारक्षेत्रातील कामच आहे. रेड झोन, राष्ट्रीय महामार्ग, क्रीडा धोरण, महिला उद्योग क्लस्टर अशा विषयांवर केंद्रीय मंत्र्यांशी चर्चा होणे, यात काहीही गैर नाही. उलट शहराच्या विकासासाठी हा सकारात्मक प्रयत्नच म्हणावा लागेल. मात्र, या दौऱ्याचे राजकीय पडसाद अधिक चर्चेत आहेत.

रवि लांडगे हे भोसरी विधानसभा मतदारसंघातील भाजपचे दोन वेळा बिनविरोध निवडून आलेले नगरसेवक आणि सध्या शहराचे महापौर आहेत. दुसरीकडे, त्याच मतदारसंघाचे भाजपचे विद्यमान आमदार महेश लांडगे यांचेही पक्षात मजबूत स्थान आहे. अशा परिस्थितीत महापौरांचा स्वतंत्र दिल्ली दौरा आणि केंद्रीय मंत्र्यांशी सलग बैठका याकडे केवळ प्रशासकीय उपक्रम म्हणून पाहायचे की त्यामागे स्वतःची स्वतंत्र राजकीय ओळख अधिक ठळक करण्याचा प्रयत्न आहे, याची चर्चा स्वाभाविक आहे.

भाजपमध्ये संघटनात्मक शिस्त आणि नेतृत्वाची स्पष्ट रचना असते. त्यामुळे पक्षातील कोणताही नेता मोठ्या प्रमाणावर केंद्रीय पातळीवर संपर्क साधत असेल, तर त्याकडे केवळ औपचारिक भेट म्हणून पाहिले जात नाही. विशेषतः विधानसभेच्या राजकारणाची चाहूल लागलेली असताना अशा प्रत्येक हालचालीचे राजकीय अर्थ लावले जातात. भोसरी विधानसभा मतदारसंघात भविष्यातील नेतृत्वाबाबत कोणताही प्रश्न आज अधिकृतपणे उपस्थित झालेला नसला, तरी रवि लांडगे यांच्या वाढत्या सक्रियतेमुळे कार्यकर्त्यांमध्ये चर्चा सुरू झाली आहे. महापौर म्हणून मिळालेल्या व्यासपीठाचा उपयोग ते शहराच्या विकासासाठी करत आहेत की त्याचबरोबर भविष्यातील मोठ्या राजकीय भूमिकेसाठी स्वतःची प्रतिमा घडवत आहेत, हा प्रश्न उपस्थित होत आहे.

अर्थात, या दौऱ्यातील सर्व बैठका विकासाच्या मुद्यांवर झाल्या, असे अधिकृतपणे सांगितले गेले आहे. मात्र, भारतीय राजकारणात विकास आणि राजकारण हे अनेकदा समांतर चालत नाहीत, तर एकमेकांना पूरक ठरतात. दिल्लीतील भेटी केवळ विकासाच्या फायली पुढे सरकवण्यासाठी होत्या की भविष्यातील राजकीय समीकरणांचीही नांदी ठरतील, याचे उत्तर काळच देईल.

आजची वस्तुस्थिती अशी आहे की भोसरीत भाजपचे नेतृत्व महेश लांडगे यांच्याकडे आहे. पण त्याच मतदारसंघातून महापौर म्हणून रवि लांडगे यांची वाढती दृश्यमानता आणि केंद्रीय नेतृत्वाशी वाढणारा संपर्क हा केवळ योगायोग आहे की पुढील राजकीय वाटचालीची नियोजनबद्ध सुरुवात, हा प्रश्न मात्र अनुत्तरितच आहे.  कदाचितदिल्लीत विकासाचा रोडमॅप मांडला गेला… की भविष्यातील राजकीय रोडमॅपही आखला गेला? याचे उत्तर आगामी काळातील भाजपच्या राजकीय घडामोडींमध्येच दडलेले असेल.