शरद पवार २०१९ लोकसभा निवडणूक पुण्यातून लढणार ? 

न्यूज पीसीएमसी नेटवर्क

मुंबई :-  २०१९ ची लोकसभा निवडणूक राष्ट्रवादी काँग्रेसचे अध्यक्ष शरद पवार लढण्याची शक्यता असून पुण्यातून लोकसभा निवडणुकीच्या मैदानात शरद पवार उतरणार असल्याचे बोलले जात आहे. पुणे लोकसभा मतदारसंघ आघाडीत काँग्रेसकडे आहे.

सुरेश कलमाडी यांनी २००९च्या लोकसभा निवडणुकीत पुण्याचा गड राखला होता. पण कॉमनवेल्थ खेळातील भ्रष्टाचार आरोपानंतर पुणे लोकसभा मतदारसंघातून विश्वजित कदम यांनी निवडणूक लढवली, पण त्यांचा पराभव झाला. विश्वजित कदम हे आता कडेगाव-पलूसचे आमदार आहेत. त्यामुळे २०१९ च्या लोकसभा निवडणुकीत पुणे लोकसभा मतदारसंघ राष्ट्रवादीने काँग्रेसकडे मागितल्याची माहिती आहे.

कोणत्याही पक्षाला २०१९ च्या लोकसभा निवडणुकीत बहुमत मिळाले नाही तर भाजप सोडून इतर सर्व प्रादेशिक पक्षांना एकत्र आणण्यासाठी शरद पवार हे नेतृत्व करू शकतात. अशा वेळी राज्यसभेऐवजी निवडणूक लढवून लोकसभेत असणे पवारांसाठी आवश्यक असल्यामुळे ही रणनिती असल्याची सूत्रांची माहिती आहे.

शरद पवार यांचा बारामती हा हक्काचा लोकसभा मतदारसंघ होता. मुलगी सुप्रिया सुळे यांच्यासाठी २००९सालच्या लोकसभा निवडणुकीत बारामती मतदारसंघ सोडल्यानंतर माढा लोकसभा मतदारसंघातून त्यांनी निवडणूक लढवली. २०१४  आधी त्यांनी लोकसभा निवडणूक न लढवण्याचा निर्णय घेतला होता. त्यामुळे ते राज्यसभेवर खासदार म्हणून गेले. पण २०१९ ची लढाई पाहता पवार स्वतः लोकसभा निवडणुकीच्या रिंगणात उतरण्याची शक्यता आहे.